پنجاب و بلوچستان نا وزیر اعلیٰ تا ہڑتوم آ صوبہ غاتا یکئی ءِ شون تننگ نا عز

کوئٹہ ( آن لائن )وزیراعلیٰ بلوچستان جام کمال خان و وزیراعلیٰ پنجاب سردار عثمان بزدار ہڑتوم آ صوبہ غاتا اُلس نا نیام اٹ اواری و قومی یکجہتی نا جوانی نا عزم انا درشانی ءِ کرسا پارینو کہ نن اسٹ اُن و اسٹ مرینہ، نفرت تالان کروک آک بے سہب مریرہ، بلوچستان نا شونداری اصل اٹ پاکستان نا شونداری ءِ، وزیر اعظم عمران خان نا کماشی ٹی شونداری نا کسر برجا سلک، ننے اواری ٹی اُلس نا جوانی کن خدمت کروئی ءِ، اُلس نا ویل آتا ایسری کن پین خواری ٹی کاریم کروئی ءِ، ہندن ءُ کاریم کینہ کانہ تانکہ بروک آ حکومت آتیکن مثال مریر، دا خیال آتا درشانی ءِ او تدوک آ دے پشین اٹ قبائلی کمامدار آتون اوڑدہی نا وخت آ ہیت وگپ کرسا کرے۔ تدوک آ دے وزیراعلی پنجاب سردار عثمان بزدار و وزیر اعلی بلوچستان جام کمال خان پشین ءِ سر مس ہراڑے وزیر اعلی پنجاب سردار عثمان بزدار قبائلی کمامدار آتیان تران کرے۔ او وخت آ وزیر اعلی پنجاب سردار عثمان بزدار تربت اٹ 100 بیڈ انا ہسپتال و تفتان اٹ کمیونٹی سنٹر نا جوڑ کننگ نا پڑو کرے و ہڑتوم آ ڈٹ آتیکن وزیر اعلی بلوچستان جام کمال خان ءِ ارب روپئی نا چیک اس تس، سردارعثمان بزدار پارینے کہ حکومت پنجاب تربت اٹ 100بیڈ انا ہسپتال اس جوڑ کیک تانکہ اُلس نا بنداوی آ جانجوڑی نا آسراتیک دوئی مریر، پنجاب بلوچستان نا جتا جتا بشخ آتیٹی ہر وڑ نا کمک تننگ اٹی ءِ، داڑان بیدس تفتان اٹ زائرین کن کمیونٹی سینٹر اس جوڑ کینہ، او پارینے کہ تربت نا ہسپتال و تفتان نا کمیونٹی سینٹر صوبائی ہم آہنگی و مابت نا نشانی اس جوڑ مریک نن اسٹ اُن و اسٹ سلنہ، نفرت تالان کروک آک بے سہب مریرہ، نن خالی ءُ نعرہ خلپنہ وخت اس کہ عملی وڑاٹ کاریم کرسا نشان ایتنہ، سردارعثمان بزدار پارینے کہ بلوچستان کنا ارٹمیکو اُرا ءِ، بلوچستان آ بننگ آن اسُل اجنبیت نا احساس مفک مستی ہم بلوچستان آ برسا کیوہ، تربت اٹ ہسپتال و تفتان اٹ کمیونٹی سینٹر نا ڈٹ پنجاب نا اُلس نا کنڈآن بلوچ ایڑھ ایلم تیکن ٹھیکی اسے۔ او پارینے کہ حکومت پنجاب بلوچستان نا شاری تا ویل آتا ایسری کن کیہی پراجیکٹ آتے اتنگ اٹی ءِ، بلوچستان نا شونداری پاکستان نا شونداری ءِ، وزیر اعظم عمران خان نا کماشی ٹی سفر برجا سلک، قومی یکجہتی و یگانگت ءِ جوان کننگ کن دا وڑ نا دورہ غاک بے کچ المی ءُ، عثمان بزدار پارینے کہ بلوچستان کن جام کمال نا خدمت آک ستا کڑزرہ، او وخت آ وزیراعلیٰ بلوچستان جام کمال خان نا تربت ہسپتال و تفتان اٹ کمیونٹی سینٹر کن فنڈ تننگ آ حکومت پنجاب و اُلس نا منتواری ءِ ہرفے۔