شونداری ڈٹ آتیان پد گوادر سرمایہ کار آتا چکار ءِ چکک،کمامدار

گوادر : گوادر پورٹ آ ودوک آ واپاری کاریمک، فری زون نا جوڑی و انفراسٹر اکچر نا جوانی کن ارب آ روپئی تا ڈٹ بنا مننگ آن پد گوادر در ملکی سر مایہ کار آتا سلاہ نا ہند اس جوڑ مریک و مروک آ منہ تو اٹ جتا جتا تو تیٹی جتا جتا ملک آتا سفارتکار آتون اوار در ملکی سرمایہ کار آک گوادر آ ہننگ اٹی ءُ۔ دا بابت اٹ ترکیہ و سعودی عرب نا سرمایہ کار آک گوادر نا دورہ ءِ کریر ہرا اینخو گوادر فری زون (نارتھ) اٹ سرمایہ کاری کننگ آ سجفنگ اٹی ءِ۔ گوادر پورٹ اتھارٹی نا کمامدار آک پاریر کہ ترکیہ نا ملٹی نیشنل کارپوریشن نیسان نا نمائندہ ڈل گوادر پورٹ نا دورہ ءِ کننگ اٹی ءِ۔ ہرانا مسخت داڑے برجا انگا واپاری، آخبت اٹ دانا وارخواہی و فری زون اٹ گودام نا جوڑ کننگ نا گمان تے پٹنگ اٹی ءِ۔ نیسان انڈسٹریل ٹیکنالوجی گروپ ترکی نا اسہ پنی ءُ برانڈ اسے ہرا جہانی کہول آ کاریم کننگ اٹی ءِ۔ نیسان گروپ ٹائروں، لیڈ ایسڈ بیٹریوں، آٹو اسپیئر پارٹس، سی این سی روبوٹک مشینری، چکنا کروک آ مادہ و فلٹر آتا کاروبار کیک۔ گوادر بندرگاہ ہرا نا بنداوی مسخت ءِ پورو کیک۔ گمانی سرمایہ کار آتے منافع بخش گمان فراوان کیک۔ پاکستان سعودی بزنس چیمبر، لاہور چیمبر و پاکستان ٹرانسپورٹ کونسل نا سینئر کمامدار آتیا اسہ پین ڈل اس گوادر نا دورہ ءِ کننگ اٹی ءِ۔ اوفتا دورہ نا بنداوی مسخت پیٹرو کیمیکل تون اوار بھلو کچ اسے ٹی کاروبار آتیٹی ڈٹ آتا درست عملداری ءِ پٹنگ ءِ۔

(خ ن)