پاکستان ءِ فوڈ سیکورٹی و توانائی نا ویل مون تروک ءِ، بلاول بھٹو

ڈیوس: وزیر خارجہ بلاول بھٹو زرداری پارینے کہ پاکستان ءِ فوڈ سیکورٹی و توانائی نا ویل مون تروک ءِ، مچ آ مسٹمی دنیا اینو زرگزرانی ویل آتا گواچی ءِ، اسہ ملک اس ہم چیلنج آتا مون ءِ تنیا توننگ کپک، چیلنج آتتون مون تننگ کن کمک درکار مریک، کشمیریک تینا آجوئی کن دنیا نا کنڈ آ ہُننگ اٹی ءُ، پاکستان روس یوکرین جھیڑہ نا ایسری نا خواہندار ءِ، ڈیووس اٹی ورلڈ اکنامک فورم نا وخت آ سکیورٹی و کوآرڈینیشن نا سرحال آ سیشن نا وخت آ تران کرسا وزیر خارجہ بلاول بھٹو زرداری ن اپاننگ ئس کہ نیو ورلڈ آرڈر نا سوب آن ایشیائی ملک آک، خاص وڑ اٹ پد تموک ملک آک بھاز خوار مننگ اٹی ءُ۔ مسٹمیکو دنیا نا زرگزران آ باریم ودنگ اٹی ءِ۔ او پارے کہ پاکستان ءِ موسمیاتی بدلی تون اوار چندی چیلنج آک مون تروک ءُ، اسہ ملک اس ہم چیلنج آتا تنیا مون ءِ ہڑسنگ کپک۔ ایلو ملک آتا کمک المی درکار مریک۔ او پارے کہ روس یوکرین جھیڑہ نا سوب آن مچ آ دنیا ٹی گیس انا نہاد آک جہانی کہول آ ودانو، وخت اس کہ مسٹمیکو دنیا نا زرگزران خراب مننگ اٹی ءِ۔ روس یوکرین جنگ انا سوب آن انسانی جھیڑہ اس ودی مسنے، جنگ انا منفی زہم مچ آ دنیا ءِ پلویڑ کننگ اٹی ءِ۔ وزیر خارجہ نا پاننگ ئس کہ روس یوکرین جنگ انا بابت پاکستان نا موقف اسُل پیدوار ءِ۔ پاکستان تینے آن ہچ ءُ جنگ اسے نا مخ تفی ءِ کپک، نئے او خواہک کہ دنیا ٹی جاگہ اس جنگ اس مرے۔ پاکستان روس یوکرین جھیڑہ نا ایسری نا خواہندار ءِ۔ ننا موقف دادے کہ جنگ آن غریبی، بیوسی، بے روزگاری و پراگندہیک ودی مریرہ، داڑان پین ہچ ءُ فائدہ اس دوئی مفک۔ او پارے کہ یوکرین نا باندات آ اقوام متحدہ نا قرارداد آتیا عمل مننگ المی ءِ، ولے ارمان نا ہیت دادے کہ دیکی کن کشمیر آ اقوام متحدہ نا قرار داد آک بیدہ کاغد آتیٹی ءُ۔ کشمیریک ہم آجوئی کن دنیا نا کنڈ آ ہُننگ اٹی ءُ۔ او پارے کہ ملک آتا نیام اٹ ہر جھیڑہ بایدے اقوام متحدہ نا قرار داد آتا رد اٹ ایسر کننگے۔ ڈیہہ اٹی جھیڑہ غاتا ایسری کن مثبت سوچ اس دوئی کروئی تمک۔ ڈیووس اٹی ورلڈ اکنامک فورم اٹی سیکورٹی و کوآرڈی نیشن آ گپ و تران نا وخت آ وزیر خارجہ بلاول بھٹو زرداری، امریکی مندوب، رومانیہ و سلوینیا نا وزیر خارجہ غاک ہم ساڑی ئسر۔

(آن لائن)