پاکستانی گڑاتا جہانی آب و برآمدی گوبرءِ گچین جوڑ کننگ المی ءِ،بنجائی واپار وزیر

افریقہ، سویل دے ٹکی ایشیا و نیامی دے ٹک اٹی پاکستانی برآمد آتا مونی دننگ نا بھلو وارخواہی اس ساڑی ارے

0

Get real time updates directly on you device, subscribe now.

اسلام آباد، بنجائی وزیرواپار جام کمال خان تون حبیب بینک لمیٹڈ نا صدر و چیف ایگزیکٹو آفیسر محمد ناصر سلیم نا کماشی ٹی ڈل اوڑدہی کرے ہراٹی چنکا و نیامی درجہ نا کاروبار(ایس ایم ایز) کن مالی کمک، ڈیجیٹل بینکنگ، برآمد آتا مونی دننگ و واپاری آسراتی تا بابت باندات آتیا گپ وتران کننگا۔ چارشنبے نادے آمروک اوڑدہی ٹی بنجائی وزیرواپار جام کمال خان پارے کہ چنکا و نیامی درجہ ناکاروبار تے دستاویزی زرگزران نا بشخ جوڑ کننگ المی ءِ وخت اس کہ ایس ایم ایز ءِ مالی وسیلہ غاتسکان آسان رسینگ فراوان کننگ حکومت نا اولیت آتیٹی اوار ءِ۔ اوپارے کہ کاروباری ضابطہ ءِ آسان جوڑ کننگ و بے گرج لائسنسنگ نا شڑت آتے چٹفنگ کن گام گیج کننگ انگ ءِ۔ اوپارے کہ پاکستانی گڑاتا جہانی آب و برآمدی گوبر ءِ گچین جوڑ کننگ المی ءِ۔ افریقہ، سویل دے ٹکی ایشیا و نیامی دے ٹک اٹی پاکستانی برآمد آتا مونی دننگ نا بھلو وارخواہی اس ساڑی ارے، دامسخت کن پوسکن آ برآمدی منڈی تا بابت ملک و بشخ آتے ٹی حکمت عملی اس تیار کننگ انگ ءِ۔ وزارت واپار و حبیب بینک انا نیام اٹ جہانی واپاری و مالیاتی رابطہ غاتے سوگو جوڑ کننگ آ امنا کننگا۔ دا رد اٹ چین، بنگلہ دیش، سری لنکا و مالدیپ تون اوار واپاری بینکاری رابطہ غاتے ودفنگ آ ہم گپ وتران کننگا۔ داہیت آ امنا کننگاکہ وزارت واپار اہم واپاری شریدار آتتون بینکاری آسراتی تامونی دننگ کن حبیب بینک انا کمکاری ءِ کیک۔ بنجائی وزیرپارے کہ بینکاری بشخ انا کمکاری پاکستانی برآمد کروک آتا جہانی منڈی تسکان رسینگ اٹ اہم کڑد ادا کننگ کیک۔ اوڑدہی ٹی وزیراعظم نا اولیت آتا رداٹ ایس ایم ایز، کشت وکشار و ہاؤسنگ نا بشخ آتیٹی مالی کمکاری ءِ ودفنگ نا باندات آتیا ہم شرہ کننگا، فریق آک برآمد، زرکاری و کاروباری شونداری کن تین پہ تینی کمکاری ءِ پین سوگو کننگ آ امناکریر۔

Get real time updates directly on you device, subscribe now.

Leave A Reply

Your email address will not be published.