دفاعی لائخی ٹی اہم پیش رفت،پاکستان نا فتح-3 سپرسونک کروز میزائل نا سرسہب آزموندہ

فتح-3 پوسکنوڑ نیویگیشن و پروپلشن نظام آن شُپ ءِ، مُر اسکان نا ہدف آتے سپرسونک رفتار و بھاز جوان شست کننگ نا بود تخک

0

Get real time updates directly on you device, subscribe now.

راولپنڈی، کوئٹہ، پاکستان قومی دفاعی لائخی تے ٹی پین اہم ءُ پیش رفت کرسا فتح 3 سپرسونک کروز میزائل نا سرسہب آزموندہ ءِ کرے۔ پوسکنوڑ ٹیکنالوجی آن شُپ دا میزائل مُر اسکان ہدف آتے سپرسونک رفتار اٹ بھاز درست و لائخی اٹ شست کننگ نا بود تخک۔ سرسہب آزموندہ ءِ پاکستان نا جم روایتی دفاعی لائخی و دفاعی موقف ءِ پین سوگو کننگ نا کنڈ آ اہم ءُ پیشرفت اس گوندنگانے‘ پاک فوج انا شعبہ تعلقات عامہ (آئی ایس پی آر) نا رِد اٹ فتح 3 میزائل پوسکنوڑ نیویگیشن و پروپلشن نظام آن شُپ ءِ، ہرا اودے مُر اسکان ہدف آتے ترندی و بھاز درست وڑ اٹ شست کننگ نا لائخی فراوان کیک۔ آئی ایس پی آر نا رِد اٹ فتح 3 میزائل نا سرسہبی آن پاکستان آرمی نا راکٹ فورس کمانڈ نا آپریشنل کڑد و جلہو نا رسینگ اٹی نمان ودکی مریک وخت اس کہ دا پیشرفت ملک انا جم روایتی دفاعی لائخی تے پین بھرمی و سوگو جوڑ کننگ اٹی اہم ءُ کڑد اس ادا کیک۔ ترجمان پاک فوج انا رِد اٹ فتح 3 میزائل نا سرسہب آزموندہ نا معائنہ ءِ کمانڈر آرمی راکٹ فورس کمانڈ و پاکستان نا سلہہ بند فوج انا بھلا افسر کریر۔ دا وخت آ میزائل نا تیاری و شون اٹی کڑد ادا کروک سائنسدان و انجینئر آک ہم ساڑی ئسر، ہرافک دا اہم سرسہبی نا معائنہ ءِ کریر۔ آئی ایس پی آر نا رِد اٹ صدر مملکت و وزیراعظم پاکستان فتح 3 سپرسونک کروز میزائل نا سرسہب آزموندہ غا مبارکبادی تسنو۔ وخت اس کہ چیف آف آرمی اسٹاف و چیف آف ڈیفنس فورسز و سروسز چیفس ہم دا اہم دفاعی سرسہبی ناستاءِ کرینے‘ صدر مملکت، وزیراعظم، چیف آف آرمی اسٹاف و چیف آف ڈیفنس فورسز و سروسز چیفس قومی دفاعی لائخی تا شون اٹی پین اہم ءُ مزل نا نشان اس دوئی کننگ آ تعلقدار کل بندغ‘ سائنسدان و انجینئر آتا استخواہی، خواری و ارادگی ءِ خراجِ تحسین پیش کریر۔ آئی ایس پی آر نا رِد اٹ فتح 3 نا سرسہب آزموندہ پاکستان نا دفاعی لائخی تے ٹی پد ریسہ پیشرفت و قومی دفاع ءِ پین سوگو کننگ نا ارادگی نا نمان ڈیک ءِ۔ وزیراعلیٰ بلوچستان میر سرفراز بگٹی پاک فوج انا کنڈ آن فتح 3 سپرسونک کروز میزائل نا سرسہب آزموندہ ءِ ملکی دفاعی لائخی تیٹی اہم ءُ مزل نا نشان اس گوندسا مچ آ قوم، پاک فوج، سائنسدان و انجینئر آتے مبارکبادی ترسا پارے کہ دا آزموندہ ملکی سیکورٹی ءِ پین سوگو کیک۔

Get real time updates directly on you device, subscribe now.

Leave A Reply

Your email address will not be published.