پاکستان و سنگاپور نا نیام اٹ کمکاری ءِ پین مونی دننگ نا گرج ءِ،وزیرخزانہ محمد اورنگزیب

ایس ایم ای تا نیام اٹ دراست رابطہ غاتے ودفنگ آن واپاری وارخواہی تیان فائدہ ہرفنگ مریک

0

Get real time updates directly on you device, subscribe now.

سنگاپور، بنجائی وزیر خزانہ بنگکاری سینیٹر محمد اورنگزیب پاکستان و سنگاپور نا نیام اٹ مالیاتی، واپاری و زرکاری نا بشخ آتیٹی کمکاری ءِ پین مونی دننگ نا گرج آ زور شاغسا پارینے کہ ہڑتوم آملک آتا کاروباری ادارہ، خاص وڑ اٹ ایس ایم ایز نا نیام اٹ دراست رابطہ غاتے ودفنگ آن تین پہ تینی واپاری وارخواہی تیان فائدہ ہرفنگ مریک۔ بنجائی وزیر خزانہ سینیٹر محمد اورنگزیب سنگاپور نا نائب وزیراعظم و وزیر توانائی، واپارو صنعت گان کم یونگ تون سنگاپور اٹی اوڑدہی کرے۔ اوڑدہی ٹی پاکستان و سنگاپور نانیام اٹ اقتصادی، واپاری و زرکاری کمکاری ءِ پین ودفنگ نا وارخواہی تیا گپ وتران کننگا۔ دا اوڑدہی سنگاپور فن ٹیک فیسٹیول 2026ء نا وخت آ مس، ہراٹی وزیرخزانہ بشخ ہلنگ اٹی ءِ۔ سنگاپور اٹی پاکستان نا ہائی کمشنر رابعہ شفیق ہم داوخت آ ساڑی ئس۔ اوڑدہی ٹی وزیرخزانہ برجاسال پاکستان و سنگاپور نا نیام اٹ سفارتی تعلقداری نا جوڑ کننگ نا 60 می سال دے انا اہمیت آ ہیت کرسا پارے کہ ہڑتوم آملک آتا نیام اٹ متکن سنگتی تعلقداری جوڑ ءِ و ہڑتوم آکنڈآتا رابطہ غاتیٹی پدریسہ ترندی بننگ ءِ۔ اوسنگاپور نا وزیرخارجہ ڈاکٹر ویویان بالاکرشنن نا ساڑی دورہ پاکستان نا ہم حوالہ ءِ تس۔ سینیٹر محمد اورنگزیب سنگاپور ءِ 2027ء ٹی آسیان نا کماشی ءِ سنبھالنگ آ مہالو آن مبارکبادی تس و داوخت آ پارے کہ پاکستان ہم شنگھائی کمکار تنظیم (ایس سی او) نا کماشی ءِ سنبھالانے۔ وزیرخزانہ مالیات، اے آئی‘ مالیاتی ٹیکنالوجی (فن ٹیک)، واپار و زرکاری تون اوار چندی بشخ آتیٹی ہڑتوم آ ملک آتا نیام اٹ خڑک کمکاری نا گیشتر گمان تیا زور شاغا۔ اوپارے کہ ہڑتوم آ ملک آتا کاروباری ادارہ، خاص وڑ اٹ چنکا و نیامی درجہ نا کاروباری ادارہ غاتے اسہ ایلو تون دراست رابطہ غاتے ودفنگ نا گرج ءِ تانکہ او دوئی واپاری و کاروباری وارخواہی تے گچین وڑاٹ پہہ مننگ کیر و اوفتیان فائدہ ہرفنگ کیر۔ اوڑدہی ٹی پاکستان نا غذائی و کشاری گڑاتا سنگاپور ءِ برآمدات آتے ودفنگ نا گمان تیا ہم گپ وتران کننگا۔ وزیرخزانہ پارے کہ سنگاپور نا منڈی ٹی پاکستانی غذائی وکشاری گڑاتا ساڑی گری و رسینگ ءِ پین ودفنگ نا گنجائشت ساڑی ءِ۔ داوخت آ وزیرخزانہ علاقائی امن و سوگوی کن پاکستان نا ارادگی نا درشانی ءِ کرے و نیامی دے ٹک ٹی امن نا اومیت درشان کرسا پارے کہ پاکستان علاقائی و جہانی کہول آ امن و سوگوی نا مونی دننگ کن تینا کوشست آتے برجا تخانے۔

Get real time updates directly on you device, subscribe now.

Leave A Reply

Your email address will not be published.