وویمن یونیورسٹی کن پوسکنوڑ آسراتی تیان شُپ ہال اس تفنگ کن فنڈ تننگک،گورنر بلوچستان جعفرخان مندوخیل
یونیورسٹی ٹی خوانوک گریجویٹ آک کانووکیشن تون اوار کل بھلا دود آتے کن ہال اٹی پبی وڑ اٹ بشخ ہلنگ کیرہ
کوئٹہ، گورنر بلوچستان پڑو کرینے کہ سردار بہادر خان وویمن یونیورسٹی کن پوسکنوڑ آسراتی تیاں شُپ ہال اس تفنگ کن بروک آ بجٹ اٹی فنڈ جتاکننگک ہراڑے کل فارغ التحصیل گریجویٹس آک کانووکیشن تون اوار کل بھلا دود آتیٹی وڑ اٹ بشخ ہلنگ کیرہ۔ ننا اسیجائی کوشست و دانشمندانہ ڈٹ بندی آن صوبہ نا کل سرکاری یونیورسٹی تے سرسہبی اٹ مالی تنکی تیان کشنگانے۔ داسہ دا یونیورسٹیک مالی نسخان نا جاگہ غا سرپلس بجٹ تون کاریم کننگ اٹی ءُ، وخت اس کہ صوبائی کہول آ صوبہ نا کل یونیورسٹی تا رینکنگ کساس دوکچ مسنے۔ دا رد اٹ وزیراعلیٰ بلوچستان میر سرفراز بگٹی، میر شعیب نوشیروانی و راحیلہ حمید خان نا کڑد و وائس چانسلر صاحب آتا کوشست آک ستا کڑزرہ۔ گورنر جعفرخان مندوخیل کل فارغ التحصیل گریجویٹس آتے، اوفتا لمہ باوہ آتے، استاد و یونیورسٹی انتظامیہ ءِ مبارکبادی تس۔ داخیال آتا درشانی ءِ او سردار بہادر خان وویمن یونیورسٹی نا دہمیکو کانووکیشن نا شریدار آتیان تران کرسا کرے۔ دا وخت آ صوبائی وزیر تعلیم راحیلہ حمید خان درانی، صوبائی وزیر میر شعیب نوشیروانی، میر سلیم کھوسہ، میر عاصم کرد گیلو، قومی اسمبلی نا باسک اختر بی بی، سینیٹر سعید الحسن مندوخیل، وائس چانسلر وویمن یونیورسٹی پروفیسر ڈاکٹر روبینہ مشتاق، جسٹس بلوچستان ہائیکورٹ نجم الدین مینگل، ایلو یونیورسٹی تا وائس چانسلر‘ تعلیم چاہندار و ریسرچ تون اوار گریجویٹس نا بھلو کچ اس ساڑی ئس۔