ریاست و ورنا تا نیام اٹ مُری تے کم کرسا اوفتے واکدار جوڑ کننگ خوانہ،وزیراعلیٰ بلوچستان میر سرفراز بگٹی

حکومت بلوچستان بنجائی حکومت نا شریداری اٹ اہم انگا شاہراہ، واپاری راہداری و سیکورٹی باندات آتا گچینی کن کاریم کننگ ءِ

0

Get real time updates directly on you device, subscribe now.

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی زرکاری نا شون تننگ، صنعتی شونداری و ورنا تے کن روزگار نا پوسکن آ وارخواہی تا ودی کننگ کن حکومت، پرائیویٹ بشخ و تعلیمی ادارہ غاتا نیام اٹ بھرمی شریداری المی ءِ۔ ریاست و ورنا تا نیام اٹ ساڑی اڑاند آتے کم کننگ، ورناتے واکدار جوڑ کننگ و اوفتے پوسکن آ خواست آتتون ہم گرنچ تعلیمی و ہنرمندی تننگ وخت انا اہم ءُ گرج اسے۔ یونیورسٹی تے روایتی تعلیم تون اوار پٹ وپول‘ اسکلز ڈویلپمنٹ، پوسکنوڑ ٹیکنالوجی و آرٹیفیشل انٹیلیجنس آ تالان کورس آ خصوصی چکار کروئی تمک تاکہ فارغ التحصیل ورناک عملی زند اٹی زرگزرانی وڑ اٹ وتواجہ مننگ کیر۔ دا خیال آتا درشانی ءِ او چارشنبے نا دے بلوچستان انویسٹمنٹ بورڈ انا کنڈآن صوبہ نا اولیکو انویسٹمنٹ اینڈ ٹریڈ ایکسپو (BITE 2026) نا بنائی دود آن تران کرسا کرے۔ بلوچستان اٹی 21 سال آن پد حکومتی کہول آ اڈ ہلوک آ دا ایکسپو نا بناءِ وزیراعلیٰ میر سرفراز بگٹی و سینیٹر سلیم مانڈوی والا کریر۔ بنائی دود اٹی چیف سیکرٹری بلوچستان شکیل قادر خان، بلوچستان انویسٹمنٹ بورڈ انا وائس چیئرمین بلال خان کاکڑ، ایف پی سی سی آئی نا پیٹرن انچیف ایس ایم تنویر، میاں زاہد حسین، مسکوہی بنجائی وزیر سلیم مانڈوی والا، پاکستان پیپلز پارٹی بلوچستان نا صدر سردار عمر گورگیج، کوئٹہ چیمبر آف کامرس نا صدر احمد گل کاکڑ، حاجی فاروق خلجی، حاجی یوسف بازئی، چیمبر آف سمال انڈسٹریز نا حاجی ولی محمد، کمشنر پشین ڈویژن قائم لاشاری، ایم ڈی بی ٹیوٹا عبدالکبیر زرکون تون اوار واپاری شخصیت، زرکار و ایلو اہم شخصیت آک بشخ ہلکر۔ ایکسپو اٹی بلوچستان تون اوار مچ آ ملک آن تعلقدار 100 آن زیات کمپنی، صوبائی محکمہ و بنجائی ریگولیٹری ادارہ غاک تینا اسٹال خلکوسر۔ ہراڑے واپاری بشخ، پیداوار، صنعتی سرجز و زرکاری نا وارخواہی تے درستی راستی کرفنگ انگ ءِ۔ شاری و طالب علم آتا بھلو کچ اس ہم ایکسپو نا دورہ ءِ کرے و اسٹال آتیٹی استخواہی نشان تس۔ وزیراعلیٰ میر سرفراز بگٹی پارے کہ دا ایکسپو نا بنداوی مسخت بلوچستان نا واپاری برادری ءِ قومی و جہانی زرکار آتتون دراست رابطہ، واپاری اواری و حکومت تون بھرمی رابطہ تا وارخواہی فراوان کننگ ءِ۔ او دا اہم آ ایونٹ نا اڈ تننگ اٹی یونیورسٹی، خاص وڑاٹ بیوٹمز (BUITEMS)، کوئٹہ چیمبر آف کامرس اینڈ انڈسٹری و صوبہ نا پوریاگر برادری نا کمکاری ناستاءِ کرسا اوفتا منت واری ءِ ہرفے۔ او پارے کہ بلوچستان پاکستان نا رقبہ نا کساس 47 فیصد بشخ ءِ‘ صوبہ ءِ بنداوی پنجر‘ صنعتی شونداری و واپاری آسراتی تا رد اٹ کیہی چیلنج آتتون مون تروئی تمنگ اٹی ءِ‘ حکومت ءِ دا ڈغاری راستک تیان جوان سماءِ و اوفتا ایسری کن جامع حکمت عملی آ عمل کننگ اٹی ءِ‘ نن ویل تیان نمن یاراستکی تیان چَپ دعویٰ کننگ نا جاگہ غا اوفتا امنائی ءِ کرسا عملی گام گیج آتا کمک اٹ بلوچستان اٹی شونداری و زرکاری کن گچین چاگڑد ودی کننگ خوانہ۔ وزیراعلیٰ پارے کہ صوبہ ٹی امن ایمنی نا حالیت و انفراسٹرکچر نا جوانی زرکاری نا شون تننگ کن بنداوی اہمیت تخک، حکومت بلوچستان بنجائی حکومت نا شریداری اٹ اہم انگا شاہراہ، واپاری راہداری و سیکورٹی نظام ءِ گچین جوڑ کننگ کن گام گیج کننگ اٹی ءِ۔ سیکورٹی نا بشخ اٹی بھلو کچ اٹی وسیلہ جتا کننگ انگ ءِ‘ وخت اس کہ پولیس و ایلو کانود نافذ کروک ادارہ غاتا کارکڑد اٹی ودکی کن ہم کاریم برجاءِ۔ او ہندی و جہانی زرکار آتے باور کرفے کہ حکومت بلوچستان، سیکورٹی فورس و پاک فوج اوفتا جان و مال و واپاری سرجز آتا رکھ اکن سنبرینگوک ءِ۔ بوستان، حب و بیلہ تون اوار صنعتی علاقہ غاتیٹی زرکار آتے رکھوک چاگڑد فراوان کننگک۔

Get real time updates directly on you device, subscribe now.

Leave A Reply

Your email address will not be published.