بنجا نا کنڈ آن کورونا نا بابت بلوچستان حکومت نا گام گیج آتا ستا

کوئٹہ :  وزیراعلیٰ بلوچستان جام کمال خان تون وزیراعظم نا خصوصی سیاسی کمکار ڈاکٹر شہباز گل جمعہ نا دے اوڑدہی کرے، اوڑدہی نا وخت آ کورونا وائرس نا حالیت آتتون اوار تین پہ تینی است خواہی نا ایلو باندات آتیا گپ و تران کننگا۔ ڈاکٹر شہباز گل کورونا وائرس نا تالانی ءِ توننگ کن بلوچستان حکومت نا گام گیج آتا ستا ءِ کرسا پارے کہ راستکی تیان معلومدار مننگ آن بیدس تفتان اٹی بلوچستان حکومت نا گام گیج آتیا بے تک تنقید کننگ جوان ءُ ہیت اس اف۔ او پارے کہ وزیراعظم نا پارت آ ای بلوچستان نا ضلع غاتا دورہ ءِ کرسا کوئٹہ غا بسنٹ، کنا دورہ نا مسخت مخلوق نا است بڈی و بنجائی حکومت نا کمک نا باور کرفنگ ءِ۔ اوڑدہی ٹی کورونا وائرس نا زرگزرانی و اقتصادی بشخ آتیا تموک زہم آ ہم ہیت و گپ کننگا۔ و امنا کننگا کہ کووڈ19 مچ آ دنیا نا زرگزران ئ، سرفینے، ولے دا حالیت اٹ نن کن وارخواہی و ٹیکنالوجی گمان تے ہم ودی کرینے، کورنا وائرس آن قوم منظم مننگ اٹی ءِ، و قوم اتی جانجوڑی و رکھی گامم گیج آتا بابت شعور تالان مسنے۔ کورونا وائرس نئے بیرہ انسانی جان بلکن زرگزران کن ہم بھلو چیلنج اسے۔ وزیراعلیٰ پارے کہ بنا ٹی الس ءِ کورونا وائرس نا نسخان تا بابت باور کرفنگ سخت ئس، ولے داسہ اوفک ہز کننگ ءُ، او پارے کہ پاکستان اٹی فوڈ سیکورٹی نا حالیت است جمی نا سوب ءِ۔ و اللہ نا خاص رحمت ءِ ہرانا سوب آن کورونا وائرس نا زرگزرانی اہم داسکان بھاز زیات نسخان نا سوب متنے۔ وزیراعلیٰ پارے کہ کورونا وائرس نا رویہ نا بابت داسکان مچ آ دنیا ٹی بیرہ کساس کننگ انگ ءِ، و پورو پٹ و پول و ریسرچ آن پد سہی حالیت مون آ بننگ کیک۔ او پارے کہ حکومت بلوچستان کورونا وائرس غان روزگار و پوریا غا تموک زہم آتے کم کننگ کن ڈٹ ڈَول سجفنگ ءِ۔ صوبہ ٹی سنت سیوت اٹ چنکا کچ انا واپار تے کن قرض حسنہ نا پروگرام بنا کننگانے، و بروک آ مالی سال انا بجٹ اٹی زرگزرانی کمکاری نا فراوانی نا پین پروگرام ہم مون آ اتنگک، ہراڑان ورناک تینا روزگار تے بنا کننگ کیرہ۔ وزیراعلیٰ پارے کہ انٹر پنیورشپ نا مسخت تینا مخلوق ءِ زرگزرانی وڑ اٹ تینا نت تیا سلفنگ ءِ۔ و پیشن آ بروک کسبکار آتے ہم کمک فراوان کرسا اوفتے تینا کسب ءِ کاریم اٹ اتنگ نا وارخواہی ایتنہ۔ وزیراعلیٰ پارے کہ بلوچستان نا ہر ضلع ٹی زرگزرانی سرجز آتے کن وارخواہی ارے۔ خاص وڑ اٹ کشت و کشار، ماہی گیری و مالداری، تون اوار ایلو بشخ آتیٹی پوریا کروک آتے کن گمانک روشنا ءُ۔ وزیراعظم کے خصوصی کمکار زرگزرانی و راجی شونداری و زرگزران نا سوگوی کن وزیراعلیٰ بلوچستان نا وژن و صوبائی حکومت نا گام گیج آتا ستا ءِ کرے۔

(خ ن)