جسٹس قاضی فائز عیسیٰ نا برخلاف صدارتی ریفرنس کالعدم

اسلام آباد: سپریم کورٹ آف پاکستان نا دہ باسکی لارجر بنچ صدر مملکت ڈاکٹر عارف علوی نا کنڈ آن سپریم جوڈیشل کمیشن ءِ جسٹس قاضی فائز عیسیٰ نا برخلاف راہی کروک صدارتی ریفرنس ءِ غیر کانودی گوندسا اودے خارج کننگ نا پرمان جاری کرینے۔ دہ باسکی بنچ اٹی اوار جسٹس ےحیٰ آفریدی ریفرنس نا برخلاف دائر اپیل آتے ناقابل سماعت گوندا، وخت اس کہ ہفت جج ہرافتیٹی جسٹس عمر عطاءبندیال، جسٹس منظور احمد ملک، جسٹس فیصل عرب، جسٹس مظہر عالم کاکا خیل، جسٹس سجاد علی شاہ، جسٹس منیب اختر، جسٹس قاضی محمد امین اوار ئسر، اوفک تعلقدار کمشنر ان لینڈ ریونیو ءِ آرڈر جاری مننگ نا ہفت دے اٹی جسٹس قاضی فائز عیسیٰ نا اُرائی و اونا چنا تے انکم ٹیکس آرڈینینس 2011ءنا رد اٹ نوٹس جاری کرسا پیشن ملک ہلنگوک میرات آتے کاریم اٹ اتنگوک سورس و فنڈ آتا بابت سرجم آتے دوئی کننگ نا پابند گوندار۔ آرڈر نا رد اٹ عدالتی فیصلہ غان مست انا جسٹس قاضی فائز عیسی نا اُرائی و اونا چنا تا بابت مروک ہر وڑ انا کارروائی تے کالعدم گوندنگانے۔ وخت اس کہ کمشنر ان لینڈ ریونیو ءِ جسٹس قاضی فائز عیسیٰ نا اُرائی و چنا تے اوفتا اسلام آباد نا سرکاری ہنکین اٹ پوسکن ءُ نوٹس سرو کننگ نا پرمان کننگانے۔ عدالتی پرمان اٹی جسٹس قاضی فائز عیسیٰ نا اُرائی و اونا چنا تے کمشنر ان لینڈ ریونیو ڈیپارٹمنٹ تون کمک کننگ نا ہم پاننگانے، وخت اس کہ سلاہ ئی کاروائی ٹی ہڑتوم آ کنڈ آتیان اسٹ اسے نا ہم ملک اٹی مفننگ نا ہیلہ کرسا کارروائی ءِ تل ول نا گواچی کپننگ نا پابند کننگانے۔ فیصلہ نا رد اٹ جسٹس قاضی فائز عیسیٰ نا خاہوت نا کنڈ آن کلیریفیکشن آن پد کمشنر ان لینڈ ریوینو اوفتے اسہ وار اس خف توننگ نا وارخواہی ہم ایتک۔ عدالتی فیصلہ نا رد اٹ خراج نا باندات آتا بابت غٹ کاروائی تے کمشنر ان لینڈ ریونیو 60 دے اٹی پورو کننگ نا پابند مریک، و دا رد اٹ ہچ ءُ تل ول اس امنا کننگپک، فیصلہ نا رد اٹ چیئرمین ایف بی آر عدالتی فیصلہ نا جاری مننگ نا ہفت دے اٹی جسٹس قاضی فائز عیسی نا خاہوت آن دوئی مروک غٹ معلومداری تے سپریم جوڈیشل کونسل نا سیکرٹری ءِ سر کننگ نا پابند مریک۔ باندات نا سرجم رپورٹ آرڈر جاری منگن نا اولیکو سَد دے اٹی چیئرمین ایف بی آر چیئرمین سپریم جوڈیشل کونسل ءِ تننگ نا پابند مریک، اگہ او دن کننگ کتو تو سیکرٹری سپریم جوڈیشل کونسل چٹھی نا کمک اٹ چیئرمین ایف بی آر آن دا بابت سفائی خواہک، اگہ اونا ہم ورندی رسینگتو تو چیئرمین سپریم جوڈیشل کونسل دا باندات کانودی کاروائی نا حق ءِ کاریم اٹ اتنگ کیک۔ فیصلہ ٹی دہ باسکی بنچ انا مسہ باسک جج ہرافتیٹی جسٹس مقبول باقر، جسٹس سید منصور علی شاہ و جسٹس یحیٰ آفریدی اوار ئسر، تینا اختلافی نوٹ اٹی جسٹس قاضی فائز عیسیٰ نا برخلاف دائر صدارتی ریفرنس ءِ عدلیہ نا آجوئی آ جلہو گوندسا جسٹس قاضی فائز عیسیٰ ءِ شاری سے نا وڑ آئین پاکستان نا رد اٹ رسینگوک غٹ حق آتے تننگ نا حقدار پاننگا۔ 

(آن لائن)