خونی آ کسر

نی کسر نا خون ءِ ہُر

زیبل آ دا مَش تے ہر

گدرینگسہ نی تارمہ ٹی

خن تے مل نی دادے ہر

…………

انت کرے ظالم یزید

انت ہلاکو کسفے بندغ

چک خڷ نی دانگ ہُر

دا کسر نا خون ءِ ہُر

اینو نا ہیت اس اف کہ داڑا نن لکھپن، پاپن یا ہوغپن، دا اسٹ پُلتنے، ہزار آتے جِتا کرسا ننے آن درینے۔ جی اؤ ہندا بلوچستان نا زیبا غا کسر (روڈ) نا ہیت ءِ کیوہ ہرا کہ مَش و تلار تا سوب آن تینا زیبائی ٹی کل آن یکتا و جِتا ءِ۔ ہر بندغ نا است آ دو تخِو یا ہر اخبار ءِ پنہ پنہ کیو، ہرا چینل ءِ ملِو یا ای سفر کیو دا کسر اٹ۔ است کپ کپ مریک، ہر موڑ آ اسہ ہنین ءُ ایڑھ یا ایلم اسے نا دتر نا گند لگک۔ ہر کنڈ آن اوفتا گاڈی تا پڑزہ غاک خننگرہ۔ نی پا دا است کپ امر مف؟ نی پا سفر اٹی خوش امر مرین؟ ارِّف بلوچ نا ہر چنا غان کہ دا سفر اٹ اونا خڑینک آک انتئے بریرہ؟ است انا ڈکھ و ویل آتے بیان کننگ کن لوز ہم مروئی ءِ، ولے دا بلوچستان ءِ صاحب! داڑے ہمو ہم سنگتی ءِ ہلیرہ۔ 

اینو بلوچستان نا روڈ، اوفتا زیبائی و ہنینی، اوفتا خن اٹ جاہ کروک آ ندارہ کل اسہ کنڈ آ ولے بندغ آتا نسخان آک است آ شورانک آنبار تخوک ءُ، ببو کہ دا ظالم و خونی آ کسر نا کِسہ غاتے بنن، بر کہ اینو ماتن ءِ داڑے نن برجا تخن، بر گڑا چیہانٹ ءِ لمہ غاتا بنِن۔ کوئٹہ غان کراچی اسکان دا کسر کم و وَد ہفت سد (700) کلو میٹر و دہ (10) گھنٹہ نا سفر ءِ۔ دا خونی آ روڈ تینا جوڑ مننگ آن ہلیس اینو اسکان ہنین و گچین آ بندغ آتا دتر اٹ سِلّنگانے و زندہ غاتا خڑینک آتیٹ شون ہلکنے۔ اگہ بندغ آتا پن تے نوشتہ کننگ بنا کیو تو مننگ کیک کتاب آک پر مریر، آفیسر آن ہلیس، ڈاکٹر، استاد، فٹبالر، بزغر خوانندہ و ناخوانندہ اسکان دا کسر ننے نسخان تسنے کہ ہرافتا بدل بھاز بننگ کپک۔ نیاڑی، نرینہ، چنا، پیر و ورنا کل ءِ ننے آن درینے۔

سوج ودی مرسا مزغ اٹ دا ہیت تولپک کہ دا شکست آتا سوب کسر نا خرابی، حکومت و حکمران آتا جان بڈی یا ننا بے احتیاطی، کم علمی ءِ؟ 

اول تو دا کل گِڑا تا زموار حکومت ءِ تکرہ، انتئے کہ بلوچستان نا کسر ہمو کسر ءِ کہ کراچی آن ہلیس چمن و اوغانستان بارڈر اسکان کاہک و چنکا و بھلا گاڈی تا کسر ءِ، کسر تَنک، چُنک و اونا زی آ ہنوک آ گاڈیک بھاز زیات ءُ، ہر حکومت تینا وخت اٹ بریک قول اس کیک، ولے دا کسر جوڑ مننگ ءِ خنپک۔ مخلوق ءِ ریفسا کیرہ کہ اینو ہزار آ بندغ آتا نسخان مسنے، حکومت نا کنڈ آن ٹریفک نا اصول و کانود آتیا کاریم ہچ مفننگ ءِ، ہراڑان مخلوق ءِ ٹریفک اصول آتا مون و پد انا خبر اف، گاڈی تا تیز ہِننگ، یا گاڈی چلیفنگ نا وخت آ موبائل اٹ مزغ خلنگ، علم و آگاہی نا کمتی نا نشانیک ءُ۔ ایلو کل آن بھلا سوب ہراڑان کہ نن تینے کشنہ او ننا تینا بے احتیاطی و کم علمی ءِ کہ گاڈی امر دینہ؟ اسہ بندغ اسے ہژدہ سال متنے، شناختی اف، لیسن اف، عقل و سمجھ نا کمتی ءِ، ولے او ہم دا کسر نا اسہ بھاز بھلو استاد (ڈیور) اس پاہک تینے، لمہ باوہ ءِ ہم سدھ و سما اف، حکومت ہم بے خیال ءِ کہ لیسن آن بیدس دافک گاڈی انت کہ موٹر سائیکل ہم چلیفنگ نا وڑ اٹ افس۔ گڑا پا شکست آک امر مفس؟ اسہ وار کہ اسٹ اسٹیرنگ آ تُوس او تکک دنیا ءِ ای تورینٹ۔ نئے گاڈی خنک نئے موٹر سائیکل یا بیش ہُچ و خراس کل ءِ لغت کرسا روان ءِ۔ گڑا پا امر شکست آن بچون؟ حکومت تون اوار اوار نن تینٹ ہم تینا کہنگ و معذوری تا زموار ارین، حکومت اینو کسر تے جوڑ کے ہم تانکہ نن محتاط متنن ہِچ مفک، ہندا کسر آ نن بھلا بھلا ہُچ، خراس، کچک و میڷ تے خنپنہ و لتاڑسا کانہ ہرا ننا تیز رفتاری و بے احتیاطی نا کل آن بھلا شاہدی ءِ، مدام ہر گڑا حکومت نا کاٹم آ ہم اف و ہر نسخان نا سوب الس ہم اف، یات سلے کہ چاپ اِرا دو اٹ خلنگک، و ہندا وڑ اٹ دا نسخان تے ٹی حکومت تون اوار اوار ننا ہم بشخ اس ارے ہراڑے کہ ننے مونی بروئی و تینٹ کاریم کروئی تمک، آگاہی مہم چلیفوئی تمک و حکومت آن ہم خواست کین کہ داٹی ننا کمک و مدت ءِ کے۔ راج انا خوانندہ و باشعور آ بندغ آک بایدے داٹی بشخ ہلیر و ہر بندغ تینا وڑ اٹ تینا زمواری ءِ پورو کے۔ لکھنگ، پاننگ، چنا تے توننگ و حکومت آن خواست کننگ دا کل ننا کاریم ءِ، ہرافتیان نن تینا جان ءِ خلاس کینہ۔ ببو کہ اوار مرین، ببو نن و نم دا جہد ءِ ہرفن و پین نسخان آن تینے و تینا ایلم ایڑھ تے بچفن۔ دیر ءِ خبر کہ بروک آ وخت اخس بندغ پین دا کسر آ شکست نا گواچی مریر گُڑا نن اگہ ہمو بندغ آتیٹی مرین کہ ننا سوب آن چندی بندغ آتے ہوش برے و دا ناگہان آ شکست آتیان بچر، ہر بندغ دا نسخان آتے تینا نسخان تکے، نیکی نا کاریم اٹ بشخ ہلسا تینا وڑ اٹ آگاہی ایتے، تینے و تینا مخلوق ءِ گاڈی چلفنگ نا چم آتے پہہ کین ہم بھاز بھلو ہیت اسے، انتئے کہ دا ہم شکست آتیٹی کمتی نا سوب مریک، انشاء اللہ۔ ننا حرکت، حکومتی ادارہ غاتے ہم نوا تُغ آن ٹوہنگ اٹ کمکار مرے۔ و کسر ہم بھلن مرے، ولے اول ننے آن دا کاریم ءِ بنا مننگ نا گرج ءِ، اللہ تعالیٰ غان دعا ءِ کہ مونی بندغ نا نسخان آن پناہ ایتے، و ننے ہمت، جیرت، پامداری و شعور عطاء کے۔ (آمین)

ہفتئی تلار
تاک: 41
24-30 Oct, 2020
پنہ: 05