ننا سیاست ننے گوہا

حیرانی مریک کہ سیاست نا پن ءِ بنگس دروغ است آ بریک یا کس دروغ اس تڑک تو دمدستی سیاست مزغ اٹ بریک، ولے انتئے؟ یخین اٹ سیاست نا دروغ اتون بھاز متکن ءُ اوار سواری اس یا سیادی اس ارے، دن کہ یووال نوح ہراری لکھک کہ انسان نا چیمپنزی و نینڈرتال بولو تتون مست انا سیادی اس ارے یا دا اِرٹ تاتہ اِلہ مار (کزن) ءُ۔ سیاست و دروغ ہم ہندن خڑک لگرہ۔ یا دن پا کہ دا ارٹ اسہ ایلو آن بیدس مرک انا گواچی مریرہ۔

وخت اس سوچ بریک کہ بیرہ ننا سیاست ہندن ءِ یا مچ جہاں اٹ سیاست بیرہ منہ بندغ نا مفاد و ایلوفتیکن وبال جان اس جوڑ ءِ؟

پاکستان اٹ سیاست نا تو ایہن ہم کُوس ءِ چپی لخ اٹ تا شاغانو گِررہ تے، ولے بلوچستان اٹ ہراڑے کہ مخلوق نا ویل آتا اسٹ انگا ایسر سیاست ءِ، او ہم اُرائی سیاست جوڑ مسنے۔ جاگیر اس تکنگک۔ اسہ سیاسی پارٹی مار، باوہ، نواسہ و کڑاسہ غاتسکان اسہ اُراٹی ہمو اُرا نا فائدہ غاتیکن سیخ آ خُلّوک ءِ۔

ایلو کنڈ آن ہرس تو چنکا سیاست دان آن ہلیس بھلا میر و سڑدار اسکان و چنکے چنکا پارٹی آن ہلیس بھل کہ بھلا اسکان ہر کس تینا ذات انا فائدہ ءِ مون آ تخسا سیاست ءِ کاریم اٹ اتیک۔

باور کیس سیاست اسہ گچین آن گچین ءُ ادارہ اس ہم ارے، ازباب اس ہم ارے۔ داسہ خواجہ غاتا دوٹی ءِ کہ داڑٹ دوشہ نا کاٹم ءِ کٹِر یا تینا چاگڑد نا ہمو بندغ آتا ہرا دا ازباب ءِ سیاسی خواجہ نا دوٹی تسنو۔

بلوچستان اٹ سیاست اسہ ویل اسے بلکن آستونک نا دوشہ اسے۔

اینو بلوچستان یونیورسٹی ٹی دے پہ دے آ تعلیم نا آب شیف ہننگ نا زموار ہم ہندا سیاست و سیاسی پارٹیک ءُ، ورنا اسٹوڈنٹ آتا چنکے چنکو کاریم اس سوشل میڈیا غا شاغنگ و اوفتے کن خطرہ ودی کننگ اٹی ہم بھلو کچ اس بلوچستان نا حق اکن نعرہ خلوک آتا دو ارے۔

یات سلے کہ بلوچستان نا کل آن بھلا سرمایہ ورناک ءُ ہرافتے سیاست و سیاسی غوغا تا سوب آن مدام تینا تعلیم و جون تیان دو سلوئی تمانے۔ تعلیم آ سیاست کننگ یا کہوک انگا جون آ سیاست کننگک۔ کہنگ آن مست کہوک انگا ءِ جمہوری وڑ اٹ بچفنگوسس تو ننا سیاستدان لائخ تکنگاکہ، داسہ تو ہر کس پنڈوخ تکسا تینا وونٹ ءِ ایتک تے بس۔

کہوک آ جون آ سیاست مفک بلکہ زندہ غاتا قدر مرے، ورنا تے تعلیم نا کنڈ آ چکار کرفنگے، سیاست ءِ جوان کاریم اٹ اتنگے تو گڑا سیاست ہمو ادارہ جوڑ مریک ہرادے ایسیموگلو تینا کتاب اٹی لکھانے۔ جائی سیاست ہمو گڑا ءِ ہرا یورپ نا اسہ کنڈ ءِ اینو ابدی روشنائی بشخا و ایلو کنڈ ءِ مدام اوندائی نا گواچی کرے۔ سیاست ہمو ادارہ ئس کہ او سری لنکا ءِ بین آ سر کرے و چین ءِ آسمان آ۔

ننا تو سیاسی خواجہ غاتے الس نا ویل آتتون ہچ ءُ است خواہی اس اف، تعلیم تو اسل کس انا تا تُک اٹ بفک کہ داڑکن سوچن بلکن چَپی تعلیمی ادارہ غاتا بربادی نا زمواری ہم ہندافتا زی آ بریک۔

جمہوریت اٹ سیاسی پارٹی تا بھاز بھلو کڑد اس مریک ولے داڑے جمہوریت نا تو گند ہم لگپ۔ جائی کہ سیاست ہم جاگیر اسے کہ اسہ خاندان یا اُراغان اسل ہچ پیش تمپک۔ لگک ہندن کہ نن داسکان جاگیرداری نظام نا زمزیر آتے ٹی تفوک اُن۔ سیاست جاگیر، تعلیمی ادارہ غاک و اوفتا نظام ہم جاگیر، پوسٹ آک ہم سیاست دان آتا جاگیر، خوار تو تین تون تخر تا یا بہا کیر تا۔ بس ملک زمین و جائیداد آتا خدا پڑدہ ءِ کے۔

یخین اٹ ورنا تے داڑے سیاست نا جمہوری واکداری واخبی اف، کہ انسان سیاست اٹ ہراکان ہراڑسکان تینا کاریم تے سر تننگ کیک۔

ننا مون آ سیاست نا پن ہلنگے تو خُلیس آن کُر کینہ تینے کہ ایلو ورنا تیانبار کنا ہم ڈس مفرو۔ سوب دادے کہ نن سیاست ءِ تپنہ و سیاسی جاگیردار تا با اٹ کاریم کینہ۔ ہندن کہ ننا سیاسی جاگیردار آک ننا تعلیم ءِ بھسکاری نا خڑک آ سر کرینو ہندن ننا ورنا تے، سیاست ءِ تینٹ و ننا ایلو نظام آتے ہم مش و زار جوڑ کرینو۔