بلوچستان، اسہ پین بے پتی تحریک اس

عبدالحفیظ ابابکی

0

Get real time updates directly on you device, subscribe now.

 

بلوچستان نا سیاست اٹ شیفی بڑزی برسا کرینے۔ و دا منہ سال اسے آن تو داٹی پارلیمانی پڑ آ بھاز بھلو بھلو شیف بڑزی بننگ ءُ۔ 2018ء نا لس گچین کاری تے ٹی بلوچستان اٹ پوسکن جوڑ مروک پارٹی بلوچستان عوامی پارٹی نا سرسہبی آن پد پارٹی بلوچستان اٹ گیشتری دوئی کروک پارلیمانی پارٹی جوڑ مس۔ بلوچستان اٹ بلوچستان عوامی پارٹی‘ تحریک انصاف‘ بی این پی عوامی، اے این پی‘ ہزارہ ڈیموکریٹک پارٹی نا اواری اٹ سیوتی حکومت جوڑ کننگا و جام کمال خان ءِ بلوچستان نا وزیراعلیٰ جوڑ کننگا۔ وخت اس کہ بلوچستان اٹ ایلو جماعت جمعیت علماء اسلام‘ بلوچستان نیشنل پارٹی مینگل و پشتونخوامیپ و آجو باسک نواب اسلم خان رئیسانی اپوزیشن اٹ ئس۔ وخت اس کہ ساڑی وزیراعلیٰ بلوچستان میرعبدالقدوس بزنجو اسپیکر بلوچستان اسمبلی مننگ آن پد ہم تینا جند انا پارٹی نا حکومت آن خوش الو‘ ایلو کنڈ آ جام کمال خان نا حکومت نا اولیکو بجٹ آن اپوزیشن جماعت و آجو باسک نواب اسلم رئیسانی نا غاو ئس کہ حکومت اپوزیشن جماعت آتا باسک آتے اوفتا حلقہ غاتے ٹی شونداری کاریم کرفنگ کن فنڈ تفننگ ءِ۔ ہمو وخت انا اسپیکر وساڑی وزیراعلیٰ بلوچستان ہم مدام ہندا غاو کریکہ کہ جام کمال کنا علاقہ نا شونداری کاریم تیکن فنڈ تفننگ ءِ۔ جام کمال خان نا مسہ سال انا حکومت اٹ جام کمال خان آن اونا پارٹی نا کیہی باسک آک وار اس خوش مسرہ وار اس غصہ۔ وخت اس کہ میرعبدالقدوس بزنجو مدام اونا برخلاف ئس و اوڑا دوبہ ہم خللکہ کہ آواران اٹ گچین مروک ایم پی اے ءِ فنڈ تننگ نا جاگہ غا نان الیکٹڈ اسے فنڈ ترسا شونداری فنڈ آتے ٹی کرپشن کننگ انگ ءِ۔ اپوزیشن جماعت آتا ہم مدام ہندا غاو ئسکہ کہ اوفتا حلقہ غاتے ٹی ہمو بندغ آک ہرافک لس گچین کاری تے ٹی اوفتیان با تسنو، اوفتے فنڈ ترسا الس نا فنڈ آتے کرپشن ناگواچی کننگ انگ ءِ۔

اصل اٹ اپوزیشن جماعت آتیکن فریشانی دا ہم ئس کہ اوفتا حلقہ غاتے ٹی پیشن نا بندغ آتے فنڈ تننگ آن حلقہ نا الس نا است اوفتیان پنک۔ اوفک تینا گیشتری اسمبلی نا دیوان تے ٹی حکومت و خاص وڑ اٹ جام کمال خان آن ہندا غاو کریرہ کہ ننا علاقہ ٹی شونداری کاریم تے ننے آن با تروک بندغ آتیان کرفنگ نا جاگہ غا ننا دو اٹ کرفنگے‘ تاکہ نن الس ءِ حساب تننگ کین ولے حکومت اوفتا دا خواست و غاو آ ہچ چکار کتوکہ۔ جام کمال خان نا دور اٹ سیاسی‘ السی‘ ایسوسی ایشن آتا کنڈآن اخس کہ برانزی مچی مسکہ اوفتے ٹی اپوزیشن نا باسک آک المی بشخ ہلرہ و تینا غاو تتون اوار ہمو مچی نا غاو تیا حکومت آ سخت تنقیدکریرہ۔ دا حالیت آک ہندن اپوزیشن ومیرعبدالقدوس نا غاو تے ٹی گدرینگسا کریر۔ اخیر گدرینگوک آسال ستمبر اٹ جمعیت علمائے اسلام و بلوچستان نیشنل پارٹی آ ساڑی اپوزیشن سیوت جام کمال نا برخلاف بے پتی نا تحریک جمع کرفے ہرادے تکنیکی سوب آن مسترد کننگا۔ ولدا تُواسے آن پد اکتوبر اٹ جام کمال نا برخلاف میر عبدالقدوس بزنجو ناکماشی ٹی اونا تینا جند انا جماعت و حکومت اٹ اوار ایلو جماعت آتا باسک آتا کنڈآن بے پتی ناتحریک جمع کرفنگا ہرانا رد اٹ جام کمال خان ءِ تینا عہدہ غان استیفہ تروئی تما۔ بلوچستان عوامی پارٹی، بی این پی عوامی، و اونا ایلو سیوتی جماعت آک میرعبدالقدوس بزنجو ءِ تینا وزیراعلیٰ پن کریر و وخت اس کہ دا وخت آ اپوزیشن میرعبدالقدوس نا مخی تفی کننگ آن پد ہم وونٹ بٹنگ نا عمل آن تینے مُر تخا انتئے کہ اپوزیشن نا اوار مفننگ آن پدہم میرعبدالقدوس بزنجو ءِ درکار بلوچستان عوامی پارٹی‘ تحریک انصاف‘ عوامی نیشنل پارٹی‘ ہزارہ ڈیموکریٹک نا وونٹ آک پورو ئسر۔ جام کمال خان نا ہننگ و میر عبدالقدوس بزنجو نا وزیر اعلیٰ جوڑ مننگ آن پد اپوزیشن خوش وخت اس کہ جام کمال خان نا حکومت نا سیوتی اے این پی بھاز خوش الو ولے ولدا ہم اودے وزارت تننگا وکابینہ ٹی اوار مننگ آن پد سیوتی حکومت نابشخ جوڑ مس۔ میرعبدالقدوس بزنجو وزیراعلیٰ جوڑ مننگ آن پد پڑو کرے کہ اونا حکومت اپوزیشن و حکومتی باسک آتا حلقہ غاتے بریبری نا بنداو آ فنڈ ایتک۔ اپوزیشن باسک آتے فنڈ تننگ آ میرعبدالقدوس بزنجو نا حکومت ءِ جوڑکننگ اٹ مون اٹ مروک میر ظہور بلیدی ہم خر کرے‘ وخت اس کہ اے این پی نا وزیر تا بیان تیان ہم لگاکہ کہ او ہم اپوزیشن جماعت آتے فنڈ تننگ آ خوش افس ولے ولدا ہم او حکومت نا بشخ ئسر۔

میرعبدالقدوس بزنجونا حکومت نا منہ وخت گدرینگ آن پد تحریک انصاف نا سردار یار محمدرند‘ میر ظہور بلیدی پاش وڑ اٹ حکومت نا برخلاف مسر۔ داسہ اسہ وار ولدا وزیراعلیٰ بلوچستان میرعبدالقدوس بزنجونا برخلاف اونا تینا جند انا جماعت بی اے پی، سیوتی جماعت اے این پی و پاکستان تحریک انصاف نا 14باسک انا دستخط اٹ بے پتی نا تحریک بلوچستان اسمبلی ٹی جمع کرفنگانے و میر عبدالقدوس بزنجو آاپوزیشن ءِ فنڈ تننگ نا جاگہ غا کرپشن نا دوبہ خلنگ انگ ءِ۔ وخت اس کہ دا وخت اسکان اپوزیشن ناکنڈآن ہچ ردعمل مون آ بتنے وخت اس کہ بے پتی تحریک جمع کرفوک آک پاننگ ءُ کہ پی ڈی ایم اٹ اوار جماعت آک نن تون تفنگ نا قول کرینو و اونا تینا قول ءِ پورو کیرہ۔ ولے دا ہم ارے کہ داتم اسکان نا حالیت آتیان تو ہندن لگک کہ ہرافک کہ بے پتی تحریک جمع کرفینو، ہندافک ساڑی وزیر اعلیٰ غان غاوی ءُ، و دافتیان بیدس پین کس انا کنڈ آن داتم اسکان ہچ ءُ غاو اس مونی بتنے، و اگہ دا گمان راست مس تو دا بے پتی تحریک نا سرسہبی نا رد اٹ بھاز کم اٹو کچ اسے۔ مڑوئی بلوچستان اٹ حکومت نا بدل مننگ نا فائدہ الس ءِ اخس رسینگک دانا سما اف ولے جام کمال خان نا حکومت نا بدل مننگ آن پد اپوزیشن جماعت آتا حلقہ غاتے ٹی گڑاس شونداری کاریم خننگ انگ ءِ۔ داسکان دا پک اف کہ دا 14 باسک آن بیدس پین اخس باسک میرعبدالقدوس بزنجو نا برخلاف مریرہ و اپوزیشن ناباسک آک امر کیرہ۔ انتئے کہ میرعبدالقدوس بزنجونا برخلاف ہمو باسک آک بے پتی ناتحریک جمع کرفینو ہرافتیان گیشتری تا اپوزیشن ءِ فنڈ تننگ نا خلاف ءِ۔

(نوشتکار ”تلار“ نا شینکار ءِ)

Get real time updates directly on you device, subscribe now.

Leave A Reply

Your email address will not be published.