بلوچستان اٹ زرکاری نا بھلو وارخواہی ارے، امان اللہ یاسین زئی

0

Get real time updates directly on you device, subscribe now.

کوئٹہ (اے پی پی) گورنربلوچستان امان اللہ خان یاسین زئی پارینے کہ صوبہ بلوچستان نئے بیرہ تینا دنگ انا اعتبار اٹ خاص اہمیت تخک بلکن داڑے جہانی و قومی زرکارآتے کن زرکاری نا بھلووارخواہی اس ہم ساڑی ارے۔ راج اٹ صنعت و واپار تون گنڈوک بندغ آتا قومی پیدوار اٹ ودکی، مخلوق ءِ روزگار نا گیشتر وارخواہی فراوان کننگ، زرکاری ءِ مون آ دننگ و ہمسایہ ملک آتا واپاری منڈی تسکان رسینگ دوئی کننگ نا روشنا گمان ارے۔ داخیال آتا درشانی ءِ او چارشنبے نادے آ گورنرہاؤس کوئٹہ ٹی چمن چیمبرآف کامرس نا صدر حاجی جلات خان نا کماشی ٹی پوریاگر برادری نا ڈل اتون اوڑدہی ٹی گپ وتران کرساکرے۔ چمن چیمبرآف کامرس نا ڈل اتون گپ وتران کرسا گورنر بلوچستان پارے کہ خڑک آخبت اٹ پیش بروک آ زرگزرانی و واپاری بدلی تا رداٹ ننے صوبہ ٹی فنی و تکنیکی ادارہ غاتا فعالیت و تینا پوسکن آ چین ءِ پوسکن آ مہارت ہیل تننگ آ پبی چکار کروئی مریک تانکہ صنعتی و واپاری بشخ آتے پوسکن آ وڑوڈول آتیا اتنگ مرے۔ اسہ سوج اسے نا ورندی ٹی گورنر امان اللہ خان یاسین زئی پارے کہ حکومت تون اوار اوار الس ءِ ہم ضلع نا کہول آ سرکاری ادارہ غاتے ٹی استاد و ڈاکٹر آتا حاضری تے پک کننگ کن تینا پبی کڑد ءِ اداکیر۔ اوپارے کہ چمن نا پوریاگر آتے مون تروک ویل و مشکل آتا ننے احساس ارے۔ کورونا دین انا سوب آن کاروباری ہند و تفتان و چمن بارڈرنا بند مننگ آن زند انا غٹ بشخ آک بھاز زہمی مسنو ولے حکومت غٹ واپاری و کاروباری سرجزآتا بحالی و زرگزرانی سوگوی کن غٹ دوئی وسیلہ غاتے کاریم اٹ اتنگ ءِ۔

Get real time updates directly on you device, subscribe now.

Leave A Reply

Your email address will not be published.