قومی اسمبلی نا 7 باسک آ پارلیمنٹ نا دنگ اٹ پترینگ آ رکھ

اسلام آباد(مانیٹرنگ ڈیسک/ آن لائن) اسپیکر قومی اسمبلی تدوک آ دے قومی اسمبلی ٹی مروک آ ہلہلہ غا ایکشن ہلسا 7 اسمبلی باسک انا پارلیمنٹ ہاؤس نا دنگ اٹ پترینگ آ رکھ خلکنے۔ حوال آتا رد اٹ اسپیکر قومی اسمبلی اسد قیصر تدوک آ دے ایوان اٹی بھلا ہڑدڑ نا نوٹس ءِ ہلک، و اونا پورو جاست پاست نا پڑو کرے، قومی اسمبلی نا جاری اعلامیہ ناا رد اٹ ہرا باسک آتیا رکھ خلنگانے۔ دافتیٹی تحریک انصاف نا مسٹ، (ن) لیگ نا مسٹ، و پیپلزپارٹی نا اسہ باسک اس اوار ءِ۔ اعلامیہ نا رد اٹ اسپیکر پیپلز پارٹی نا آغا رفیع اللہ، (ن) لیگ نا شیخ روحیل اصغر، علی گوہر خان و چوہدری حامد حمید ءِ رکھ کرینے۔ وخت اس کہ تحریک انصاف نا علی نواز اعوان، عبدالمجید خان و فہیم خان آ رکھ خلنگانے۔ اعلامیہ نا رد اٹ باسک آتیا دا رکھ برپرمان اسکان خلنگانے، وخت اس کہ قومی اسمبلی سیکرٹریٹ نا کنڈ آن دا رد اٹ تعلقدار باسک و اسمبلی سیکورٹی ءِ پرمان ہم جاری کننگانے۔ ایلو کنڈآ اپوزیشن اسپیکر قومی اسمبلی نا برخلاف بے پتی نا تحریک اتنگ نا فیصلہ کرینے، و قومی اسمبلی ٹی اپوزیشن اسپیکر نا کنڈ آن 7 باسک آ رکھ انا فیصلہ ءِ مسترد کرینے۔ حوالی تا رد اٹ متحدہ اپوزیشن اسپیکر قومی اسمبلی اسد قیصرنا برخلاف بے پتی نا تحریک اتنگ نا فیصلہ کرینے، و حوال آتا رد اٹ اسپیکر نا برخلاف بے پتی کن متحدہ اپوزیشن نا کمیٹی اس ہم ٹہیفنگ آ امنا مسنے۔ ایلو کنڈ آ وزیر اعظم عمران خان و اسپیکر قومی اسمبلی اسد قیصر قومی اسمبلی ٹی قاعدہ و ضابطہ نا خلاف ورزی کروک آ حکومتی و اپوزیشن باسک آتا برخلاف سخت کارروائی و ایوان اٹ پترینگ آ رکھ آ امنا کرینو، وزیر اعظم پارے کہ ایوان نا تقدس نا خیال ءِ تخنگ حکومت نا زمواری ءِ۔ ایوان نا تقدس ءِ لتاڑ کروک آتا برخلاف بے پرخ کارروائی کننگے۔ وزیر اعظم عمران خان تون اسپیکر قومی اسمبلی اسد قیصر اوڑدہی کرے، و اودے واقعہ نا سرجم حوال تس۔ وخت اس کہ اسپیکر نا کنڈ آن ایوان نا تقدس ءِ لتاڑ کروک آتا برخلاف سخت کارروائی و اوفتا ایوان اٹ پترینگ آ رکھ انا بابت وزیر اعظم ءِ ہیت آ کرے۔ وزیر اعظم عمران خان ناخوشگوار حالیت آ است ہسونی نا درشانی کرے و اسپیکر قومی اسمبلی ءِ پارت کرے کہ او ایوان ءِ کانود، قاعدہ و ضابطہ غاتا رد اٹ بے کنڈ ہلوک چلیفے۔ ہرافک ایوان نا تقدس ءِ لتاڑ کریر، اوفتا برخلاف بے پرخ کارروائی کننگے، کہ داکان پد دا وڑ انا واقعہ پیش بف۔ ایوان نا تقدس نا خیال ءِ تخنگ ءِ حکومت اولیت ایتک۔ تدوک آ دے مروک آ واقعہ غا بھاز ارمانی اُٹ، و ارمان نا ہیت دادے کہ ایوان ناتقدس نا لتاڑ کروک آتیٹی حکومت نا اسمبلی باسک و وزیرک ہم اریر، ہرا کاریم ءِ اپوزیشن ءِ کروئی ئس، ہمودے حکومتی باسک آک کریر۔ دا گام آن پاکستان تون اوار مچ آ دنیا ٹی مخوئی مسنن۔