ملک اٹ کرونا وائرس نا 19 پین کیس پک، ناجوڑ آتا کچ 53 مس

اسلام آباد ( مانیٹرنگ دیسک) صوبہ سندھ و پنجاب اٹ کرونا وائرس نا پین 19 کیس پک، اوکان گڈ مچ آ ملک اٹ ناجوڑ آتا کچ 53 اسکان سر مس۔ وزیراعلیٰ سندھ مراد علی شاہ پارینے کہ اینو سکھر آن بروک ئُ 40 سیمپل ٹیسٹ کننگانے ہرافتے آن 13 مثبت بسنو، او پارینے کہ سکھر اٹ 293 زائر تفتان آن بسنو، مراد علی شاہ پاریسس کہ ننے بھاز زیات پام انا گرج ئِ۔ او پین دارو و اسٹاف سکھر آ راہی کننگ اٹی اُٹ۔ داڑان مست محکمہ جانجوڑی سندھ انا رداٹ کراچی ٹی کرونا وائرس نا پین 4 کیس پک مسنو۔ کمامدار آتا پاننگ ئِ کہ مسہ ناجوڑی منہ دے مست سعودی عرب آن بسوسر وخت اس کہ اسہ ناجوڑ اسے نا ہچ ئُ ٹریول ہسٹری اس اف۔ داڑان بیدس سندھ انا حکومت نا ترجمان مرتضیٰ وہاب ٹوئٹ کرینے کہ تدوک آ نن بلوچستان آن کراچی آ بروک ئُ شاری سے نا وائرس ٹیسٹ مثبت بسنے اوکان پد اینو کراچی ٹی ناجوڑ آتا کچ 5 مسنے۔ محکمہ جانجوڑی نا رداٹ صوبہ ٹی کرونا وائرس نا کیس آتا کچ 35 مس ہرافتے آن 2 ناجوڑ جانجوڑی مننگ آن پد اُرا غا انار۔ ملک انا کل آن بھلا صوبہ نا دارالحکومت لاہور اٹ ہم کرونا وائرس نا اولیکو کیس مون آ بسنے۔ 4 دے مست دبئی آن لاہور آ بروک ئُ اسہ مسافر اس شک مننگ آ ٹیسٹ کرفے، پرائیویٹ ئُ لیبارٹری اس ناجووڑ اٹ کرونا وائرس ئِ پک کرے۔ پنجاب حکومت نا ترجمان مسرت چیمہ ہم صوبہ ٹی اولیکو کیس ئِ پک کرینے۔ او پارینے کہ زہمی آ ناجوڑ ئِ میو ہسپتال اٹ آئسولیشن وارڈ اٹ داخل کننگانے وخت اس کہ اونا خاہوت و اُرا نا ملازم آتا ٹیسٹ منفی بسنے۔ ایلو کنڈ آ چیف سیکرٹری پنجاب پارینے کہ وزیر جانجوڑی پنجاب ڈاکٹر یاسمین راشد نا کماشی ٹی مروک آ دیوان اٹ صوبہ ٹی دفعہ 144 نافذ کننگ نا فیصلہ کننگانے۔ سندھ و پنجاب اٹ کرونا وائرس نا پوسکن آ ناجوڑ آتا پک مننگ آن پد ملک اٹ زہمی آ ناجوڑ آتا کچ 52 مسنے۔ حساب اٹ پاننگانے کہ سندھ آن 35، بلوچستان اٹ 10، اسلام آباد اٹ 4، گلگت بلتستان اٹ 3 و لاہور اٹ اسہ ناجوڑ اسے۔ کرونا وائرس نا خلیس نا بابت بلوچستان حکومت 5 محکمہ غاتے آن بیدس ایلو کل صوبائی محکمہ غاتا دفتر تے 22 مارچ اسکان بند کننگ نا فیصلہ کرینے۔ بلوچستان حکومت نا فیصلہ غان پد بیرہ محکمہ نظم ونسق، داخلہ، جانجوڑی، خزانہ و محکمہ شونداری نا دفترک ملوک مریرہ۔ داڑان بیدس کل سرکاری محکمہ غاتا دفترک بند مریرہ۔