دوزیراعظم نا ملک اٹی برجا لاک ڈاﺅن ءِ 2 ہفتہ پین ودفنگ نا پڑو

0

Get real time updates directly on you device, subscribe now.

اسلام آباد :  وزیر اعظم عمران خان ملک اٹی برجا لاک ڈاﺅن ءِ 2 ہفتہ پین ودفنگ نا پڑو کرینے۔ وزیراعظم پارے کہ نن الس نا رکھ و وائرس نا تالان ءِ توننگ کن لاک ڈاون اٹی 2 ہفتہ پین ودفنگ نا فیصلہ کرینن۔ ننا الس کمک کرسا وائرس ءِ بھاز ترندی اٹ تالان مننگ آن توننگ کن پبی کمک کرے۔ دا بابت نن اوفتا منتوار اُن۔ نن اِرا پڑ آ جنگ کننگ اُن۔ دا بابت اسٹ کورونا وائرس نا تالانی ءِ توننگ ءِ تو ایلو ویل بیروزگاری ءِ، ہرا غٹ جاگہ غا تالان ءِ۔ و ننے لاک ڈاﺅن ءِ برجا تخسا اوفتے ریلیف فراوان کروئی ءِ۔ غریب تا کمک کن نن احساس پروگرام بنا کرے ہرا پاکستان نا تاریخ نا غٹ آن بھلا پروگرام ءِ و وخت اس ہم داکس اشتافی وڑ اٹ ننا ملک اٹ ایمرجنسی پروگرام درستی راستی کرفنگتنے۔ اسلام آباد اٹی نیشنل کورآرڈینیشن نا دیوان آن پد وزیر اعظم عمران خان ہیت و گپ کرسا پارے کہ صوبہ غاک لاک ڈاﺅن ءِ چٹفنگ خواپسہ تو بنجا اوفتیا زورباری کپک، خلق آتیٹی ہچ ءُ وڑ اسے نا رکھ اس اف۔ کنسٹرکشن تون مخلوق نا روزگار گنڈوک ءِ، شار تیٹی اینو آن تعمیرات نا صنعت ملنگک، اسکول، کالج و سینماک ملنگپسہ، کنسٹرکشن انڈسٹری کن اسہ آرڈیننس اس اتنگ اٹی ءِ۔ آرڈیننس نا رد اٹ تعمیراتی سیکٹر ءِ بھاز بھلو پیکیج اس ایتنہ۔ کشت و کشار آن پد غٹ آن زیات تعمیراتی بشخ اٹی واپار نا وارخواہی ارے۔ خولم نا لاب انا سیزن ءِ دا بابت غٹ اڑاند آتے اینک کرینن۔ کورونا وائرس نا سوب آن غٹ اسکول، کالج آک بند ءُ۔ کورونا وائرس نا سوب آن ملک اٹ لاک ڈاﺅن کننگانے۔ کورونا نا سوب آن 23 مارچ نا پریڈ ہم منسوخ کننگانے۔ ننے مخلوق نا خواری تا درک ءِ۔ مچ آ دنیا ٹی کورونا نا سوب آن لاک ڈاون کننگانے۔ ڈیلی ویجز و دکاندار آتا خواری نا درک ارے۔ وزیراعظم پارے کہ تعلیمی ادارہ، سینما و السی ہند آتے ملپنہ۔ او پارے کہ رمضان المبارک اٹی تراویح نا بابت عالم دین تتون سلابت کینہ۔ ہر جاگہ غا ننے حکمت عملی اس ٹہیفوئی تمک۔ وزیر اعظم قوم انا منت ءِ ہرفسا پارے کہ ننا الس کمک کرسا وائرس ءِ زیات ترندی اٹ تالان مننگ آن توننگ اٹ کمکار مس۔ و ہندا سوب ءِ کہ وائرس ننا کساس آن بھاز کم تالان مس۔ نن ہرا کساس آتے کریسن اوفتا رد اٹ 190 مرک مروئی ئسر۔ ولے ننا گچین گام گیج و لاک ڈاﺅن نا سوب آن اینو مرک آتا کچ داکان بھاز کم ئس۔ اونا پاننگ ئس کہ ہرا بندغ آک احساس پروگرام اٹ بنائی وڑ اٹ اوار مننگ کتنو، اوفتے کن ایس ایم ایس سروس اس بنا کننگ اُن، ہرانا کمک اٹ اوفتے ہم 12ہزار روپئی رسینگ کیک۔ احساس پروگرام نا رد اٹ داتم اسکان 28 لکھ خاہوت ءِ پیسہ رسینگانے۔ و اوفتے 45ارب روپئی تننگانے۔ و دا پروگرام برجا سلک۔

(آن لائن)

Get real time updates directly on you device, subscribe now.

Leave A Reply

Your email address will not be published.