سفارتی تعلقدای تے نیازی حکومت لتاڑ کرے، شہباز شریف

اسلام آباد : وزیراعظم محمد شہباز شریف پارینے کہ سیوتی حکومت نا اسہ سال کارکڑد سرسہبی نا سفر تون گنڈوک ءِ، ہراٹی پاکستان نا ساکھ بحال مس و ملک ءِ مون تروک سخت زرگزرانی و توانائی نا چیلنج آتا مون ءِ توننگا، جتا جتا منشور والا سیاسی جماعت آتا اسیجائی قومی مسخت کن اسہ پلیٹ فارم اسے آ یکجا مننگ ملک انا سیاسی ارتقاٹی اسہ اہم ءُ پیش رفت اسے نا ڈیک و مفاہمت نا سیاست نا شاہدی ءِ۔ سے شنبے نادے آ ساڑی حکومت نا اسہ سال پورو مننگ آ زرگزران، توانائی، سفارتکاری، مواصلات و چاگڑد تون اوار چندی بشخ آتیٹی حکومتی کارکڑد نا بابت تینا چندی ٹویٹ آتیٹی وزیراعظم پارے کہ اینو سیوتی حکومت نا اسہ سال پورو مننگ ءِ ہراتم ای وزارت عظمیٰ نا سوغند ہرفیٹ، کنانقطہ نظر آن دا سال بھلا چیلنج و مشکل آتا سال ئسک، عمران نیازی نا حکومت نا برخلاف بے پتی نا تحریک بیرہ دا بابت بے مٹ الوکہ پی ڈی ایم اقتدار اٹی بس بلکن داسوب آن کہ پاکستان نا کم و ود غٹ سیاسی قوت آک پارلیمنٹ نا فورم ءِ کاریم اٹ اتسا آئینی ذریعہ اٹ بے پنی آ حکومت ءِ وونٹ نا واک انا کمک اٹ اینک کننگ کن مچ مسر۔ اوپارے کہ چندی منشور تخوک آ سیاسی جماعت آتا اسیجائی قومی مسخت کن اسہ پلیٹ فارم اسے آ یکجا مننگ ملک انا سیاسی ارتقاٹی اسہ اہم ءُ پیش رفت اسے نا ڈیک ءِ ایتک۔ اوپارے کہ اپریل 2022 آن پد نا دور جنگ و جھیڑہ و بیرہلنگ نا جاگہ غا مفاہمت و کمکاری نا پوسکن آ سیاست نا شاہدی ءِ۔ اوپارے کہ عمران خان نا کنڈآن تالان کروک اقتصادی سرنگ و جہانی کہول آ پیٹرولیم مصنوعات و کنوئی آ گڑاتا نہاد آتیٹی شیف و بڑزی آن پد ہم پاکستان نا زرگزران پدریسہ رواں دواں ءِ، و ڈیفالٹ نا غٹ پیشنگوئی غلط پک مسنو، زرگزران نا بحالی کن مخلصانہ کوشست آک برجاءُ۔ وزیراعظم پارے کہ سیوتی حکومت نیازی دور حکومت اٹ پاکستان نا سفارتی تعلقداری تے ملوک آ نسخان تا پوروی و اول سرآن ٹہیفنگ تون اواراوار اوفتے ودفنگ کن سرگرداں ءِ۔ وزیراعظم پارے کہ نن الس ءِ دا پاننگ کینہ کہ تدوک آ اسہ سال اٹی نن اسہ شریدار و سنگت اسے نا وڑاٹ پاکستان نا ساکھ ءِ برجاتخنگ اٹ بھلو حد اسسکان سرسہبی دوئی کرینن۔ وزیراعظم پارے کہ پاکستان ءِ تدوک آ سال بدترین نوکاپ تون مون تروئی تما۔ حکومت داڑتون مون تننگ کن فیصلہ کن وڑاٹ بچفنگ، ریلیف و بحالی نا کوشست آتے کرے۔ لکھ آ زہمی تے راجی رکھ فراوان کرے و جہانی برادری ءِ متحرک کرے، دا گام گیج آتا دنیا ستاءِ کرینے۔ وزیراعظم پارے کہ پبلک ٹرانسپورٹ نا بنداوی پنجر نا تفنگ نا رداٹ حکومت تدوک آ سال اپریل اٹی تینا جوڑ مننگ آن پد آن اسلام آباد اٹی شونداری و ٹرانسپورٹ نا بنداوی پنجر نا ڈٹ آتا زوت پوروی آ چکار کرینے ہرانا مسخت شاری تے ہن و براٹی آسانی، آرام دہ و اڑزان آسراتی تا فراوانی ءِ۔ وزیراعظم پارے کہ تدوک آ اسہ سال اٹی نن شاری تے آسراتی تننگ کن انرجی مکس کن کوشست آتے کاریم اٹ ایسونن و دا چرجوئی ٹی شمسی،ہائیڈل و کولاآن بجلی نا ڈٹ آتیا چکار کننگ نامسخت بجلی ودی کننگ نا کبین ذریعہ ءِ اڑزان ڈٹ آتیٹی بدل کننگ ءِ۔ وزیراعظم پارے کہ جہانی کہول آ کبینی الس ءِ بھاز بے وڑ زہمی کرینے، جیو اسٹریٹجک مخاصمت، ایندھن و غذائی اجناس نا نہاد آتیٹی ودکی و بدترین نوکاپ ساڑی آ کبینی نا گڑاس سوب آک ءُ، دا مشکل آتے مون آتخسا حکومت راجی رکھ انا نیٹ ورک ءِ ودفے و ٹارگٹڈ سبسڈی مہیا کرے۔ اوپارے کہ پی ڈی ایم نا حکومت اٹی پاکستان فیٹف نا گرے لسٹ آن پیش تمنگ اٹ سرسہب مس، دا گچین بین الوزارتی رابطہ کاری و ننا عسکریت سرکڑدہ غاتا کنڈآن تروک آ مخ تفی نا سوب آن ممکن مس۔ دااسہ مرغن ءُ سفر اس ئسک ولے پدریسہ کوشست آک اودے ممکن کریر۔ وزیراعظم پارے کہ حکومت جہانی کہول آ پاکستان نا مقدمہ ءِ پیش کننگ کن موسمیاتی سفارتکاری ءِ کاریم اٹ ایس۔ جی 77 پلس چائنا نا صدر نا حیثیت اٹ نن لاس اینڈ ڈیمیج فنڈ انا ٹہیفنگ اٹ کمکار مسن، جنیوا ٹی کانفرنس اٹی 9 ارب ڈالر نا پڑو ننا سرسہب سفارتکاری نا شاہدی ءِ۔

(اے پی پی)