اوغانستان‘ طالبانک اِرا پین صوبائی دارالحکومت تینا کریر

کابل: اوغانستان اٹی طالبان و اوغان کارندہ غاتا نیام اٹ جنگ ترند مسنے، ولے جنگوڑو آک اِرا پین صوبائی دارلحکومت تینا دوٹی ہلنگ نا دعویٰ کرینو۔ درملکی خبر رساں ادارہ نا رد اٹ طالبانک جمعہ غان داتم اسکان 4 صوبائی دارالحکومت تینا دوٹی ہلنگ اٹ سرسہب مسنو، ہراڑان پد مروک پیشرفت آتیان کساس کننگ مریک کہ اوغان فورس آک کیہی پڑ تیا بے سہب مسنو۔ اوغانستان نا جہاندمی علاقہ قندوز و سرپل پدے دو بیرہمنہ گھنٹہ نا فرق اٹ طالبان تا دوٹی ہنانو۔ دا رد اٹ ہندی شاریک و کانود جوڑ کروک آک ہم حوال آتے پک کرینو کہ جنگوڑو آک بیدس بھلو جنگ اسے آن دا ہڑتوم آ علاقہ غاتے دوئی کرینو۔ قندوز نا اسہ باتی اس پارے کہ شار اٹ اسُل ہڑدڑ ءِ۔ ایلو کنڈ آ طالبانک اسہ بیان اسے ٹی بھاز آ ہند آتیا جنگ آن پد مجاہد آتا قندوس نا دارلحکومت آ کوزہ نا حوال تسنو۔ دا پیشرفت نا بابت سرپل اٹی نیاڑی تا حق آتے کن کاریم کروک پروینا عظیمی فون آ پارے کہ طالبانک سرپل شار، سرکاری ماڑی و او جاگہ نا تنصیب آتے تینا دوٹی ہلکنو، وخت اس کہ سرکاری افسر و ایلو اوغان فوجیک شار آن مسہ کلومیٹر مُر اسہ بیرک اسے ٹی گٹ مسنو۔ او پارے کہ اسہ طیارہ اس بس، ولے او تولنگ کتو۔

(آن لائن)