وزیر اعلیٰ بلوچستان نا برخلاف بے پتی نا تحریک اٹی وارخواہی رسینگا تو دھکہ اس ایتنہ تے،سردار اختر جان مینگل

بلوچستان اٹی سیاسی بحران نا زموار حکمران تا جند ءُ، بی این پی سروک

حب/کوئٹہ (آن لائن)بلوچستان نیشنل پارٹی نا سروک و قومی اسمبلی نا باسک سردار اختر جان مینگل پارینے کہ بلوچستان اٹی سیاسی بحران نا زموار حکمران آتا جند ءُ، اُرا غان اُرا نا ڈیوا خاخر ہرفینے۔ وزیر اعلیٰ بلوچستان نا برخلاف بے پتی نا تحریک اٹی وارخواہی رسینگا تو دھکہ اس ایتنہ تے۔ حکمران آک اپوزیشن ءِ اسہ کنڈ کرسا اوفتیا بکتر بند گاڈی تیٹی جلہو کریر۔ گچین مروک باسک آتا جاگہ غا گچین مفروک باسک آک، ہرافک اسہ کونسلری اس ہم کٹنگ کپسہ، اوفتے فنڈ تننگ انگ ءِ۔ جام کمال نا برخلاف بے پتی نا تحریک اپوزیشن جماعت آتا ءِ، داٹی پی ڈی ایم داٹی اوار اف۔ پنڈوراپیپرز اٹی بیرہ حکمران آخا، بلکہ اصل حکمران آتا پنک ہم اریر۔ اگہ اوفتا برخلاف کارروائی متو، تو بروک آ وخت اٹی پنڈورا بکس آخا پورو ءُ ڈرم ملنگرہ۔ دا ہیت آتا درشانی ءِ او حب اٹی میڈیا تون ہیت و گپ کرسا کرے۔ سردار اختر جان مینگل دو شنبے نا دے اسپیکر میر عبدالقدوس بزنجو نا اِلہ نا کزیت آ دعا پاتیا کرے۔ اوکان پد میڈیا تون ہیت وگپ کرسا سیاسی بحران نا زموار حکمران آتے گوندا۔ او پارے کہ حکمران آتا ڈیوالئی و گندہی تیان بحران ودی مریک۔ اینو آن مست ہم بحران بسنے، و داکان پد ہم بریک۔ تو دا کل ہمو حکمران آتا جند انا سوب آن مریرہ۔ وزیراعلیٰ بلوچستان نا برخلاف بے پتی نا تحریک صوبائی ءُ ہیت اسے، صوبائی سرکڑدہ غاتے واکداری تننگانے، اگہ ننے وارخواہی اس رسینگا تو دھکہ اس ایتنہ تے و چکنگ نا وار رسینگا تو چکنہ تے۔ داسہ وخت آشیرباد نا اف۔ وزیر اعلیٰ بلوچستان ءِ ننا گرج اف، او خود کفیل ءِ، اگہ ننا درگہ غا بس تو پارٹی فیصلہ کیک، انتئے کہ دا فیصلہ کنا دوٹی اف، پارٹی نا دوٹی ءِ۔ پی ڈی ایم تینا موقف آ سلوک ءِ، ولے منہ سیاسی جماعت اس اسہ کنڈ مسنو۔ ای پاوہ کہ پی ڈی ایم نا بروک آ دیوان اٹ فیصلہ کننگک کہ حکومت ءِ امر ٹف ٹائم تننگ مریک۔ پی ڈی ایم نا تدوک آ جلسہ غاتیٹی اودے ہرا وڑ دوستخواہی دو بس، او ای تو پاوہ اینو اسکان اسہ سیوت اسے نا بشخ اٹی ہم بتنے۔