پنڈورا پیپرز،وزیراعظم نا کنڈ آن بڑزکو کہولی جاست پاستی سیل جوڑ

0

Get real time updates directly on you device, subscribe now.

فیصلہ وزیر اعظم نا کماشی ٹی مروک دیوان اٹ کننگا، پنڈورا لیکس نا ایف آئی اے، نیب، ایف بی آر و اینٹی کرپشن جاست پاست ءِ سر ایترہ

اسلام آباد : وزیراعظم عمران خان پنڈورا پیپرز نا جاست پاست کن بڑزکو کہولی سیل اس جوڑ کرینے۔ بنجائی حوالکاری وزیر فواد چوہدری ٹویٹ کرسا پارینے کہ پنڈورا لیکس نا جاست پاتس کن وزیر اعظم عمران خان ”وزیر اعظم انسپکشن کمیشن“ نا رد اٹ اسہ بڑزکو کہولی سیل اس جوڑ کرینے، او پارے کہ بڑزکو کہولی سیل پنڈورا لیکس اٹی اوار کل بندغ آتیان ورندی بٹنگک۔ اونا پاننگ ئس کہ پنڈورا لیکس نا بابت راستکی تے قوم انا مون آ تخنگک۔ حوال آتا رد اٹ وزیراعظم عمران خان نا کماشی ٹی پنڈورا لیکس نا جاست پاست کن سیل اس جوڑ کننگ نا فیصلہ کننگانے۔ حوال آتا رد اٹ دیوان اٹی فیصلہ کننگا کہ پنڈورا لیکس نا جاست پاست ءِ قوم انا مون آ تخنگک، و بڑزکو کہولی سیل پنڈورا لیکس اٹ اوار کل بندغ آتے خواہفک، و اوفتیان پرسجو کیک۔ حوال آتا رد اٹ بنجائی جاست پاستی ایجنسی (ایف آئی اے)، قومی احتساب بیورو (نیب)، فیڈرل بورڈ آف ریونیو (ایف بی آر) و اینٹی کرپشن جاست پاست ءِ سر ایترہ۔ حوال آتا رد اٹ وزیراعظم عمران خان وزیر کانود ءِ ٹی او آر جوڑ کننگ نا ہدف تسنے، و پارت کرینے کہ راستکی تے قوم انا مون آ تخنگے۔ یات سلے کہ پنڈورا پیپرز اٹی 700 آن زیات پاکستانی تا آف شور کمپنی مونی بسنو۔ پنڈورا پیپرز اٹی وزیر خزانہ شوکت ترین نا آف شور کمپنی، وخت اس کہ فیصل واوڈا، شرجیل میمن، مونس الٰہی و علی ڈار تون اوار 700 پاکستانی تا اسٹ آن زیات آف شور کمپنی مونی بسنو۔ جاتس پاست اٹی پنجاب نا سینیئر وزیر عبدالعلیم خان نا آف شور کمپنی نا ہم حوال ارے، وخت اس کہ مسلم لیگ ن نا راہشون اسحاق ڈار نا مار انا آف شور کمپنی اس ہم پنڈورا پیپرز اٹ اوار ارے۔ پنڈورا پیپرز اٹی پیپلز پارٹی نا شرجیل میمن نا آف شور کمپنی اس ہم اوار ءِ۔ داکان بیدس بنجائی وزیر صنعت خسرو بختیار نا اُرا والا تا آف شورکمپنی تا حوال ہم پنڈورا پیپرز اٹی بسنے۔ پنڈورا پیپرز اٹی منہ ریٹائرڈ فوجی افسر، بینکار، پوریاگر و میڈیا مالک آتا آف شورکمپنی ہم مونی بسنو۔ تدوک آ دے وزیراعظم عمران خان پنڈورا پیپرز اٹی اوار پاکستانی تا جاست پاست نا پڑو کریسس۔ داسہ دا بابت سیل اس جوڑ کننگانے۔

Get real time updates directly on you device, subscribe now.

Leave A Reply

Your email address will not be published.