ٹیکنالوجی نا فائد و نسخان آک

دنیا ٹی شونداری نا ہیت مرے یا دنیا غان گو ءِ دننگ نا ہیت مرے، ننے ٹیکنالوجی نا کنڈ آ ہروئی تمک۔ ہمو قوم آک اسل بھاز شون ہلکر، بھاز آک تا شون ہلنگ اٹی ءُ۔ دا شونداری نا تا ویدن دادے کہ او تینا مزغ آتیان کاریم ہلنگ نا کوشست کریر۔ تینا زند اٹی آسراتی اتنگ نا سوب آن او پوسکن ءُ سوچ خلنگ نا بناءِ کریر۔ گڑا اینو داڑے رسینگار ہراڑے کہ اوفتا پیرہ غاک سوچنگ کتوسہ۔ ہنوک آ وخت آک شاہد ءُ کہ ہرا قوم آک دو دوٹی ہلکر و تینا لمئی بولی ٹی خواننگ ہیل کننگ کن تینا چناتے راہی کریر، اینو بھاز آسرات اریر۔

پیرہ غاتا وخت اٹی مخلوق آک ہچ، بیش، ہلی تیا ہنارہ بسرہ۔ سفر تیٹی سال آک لگارہ تا۔ بھاز آک ناجوڑ مسرہ اوفتے کن دارو دوا ہچ الوکہ۔ ہسپتال آک الوس۔ بندغ آک چناک چنکا ناجوڑی تیان خوار مسرہ و کسکرہ۔ برام تیا تین پہ تین ءِ بٹنگ انگ کن دیچہ اٹ دے لگاکہ۔ موبائل آک الوس۔ کلہو آک ہُرے آ سر مسرہ، بھاز آک سر ہم متوسہ۔ ڈکال آتیٹی بینگنی آن کسکرہ۔ کس ءِ کس انا خبر تمتوکہ۔ پنجا یا شست سال انا وخت ءِ تیر کریرہ کسکرہ۔ خولم، برنج دسنگ کن خراس، ہچ آتیان کاریم ہلکرہ۔ لشی تیٹ روتارہ تا۔ گوبٹ کریرہ تا۔ اوکان پد دیخہ غلہ رسینگاکہ تا۔ ڈغار آن دیر کشنگ سخت ئس۔ کاریز ختارہ ختارہ بیخ تا پیش تماسس۔ مش تے ٹی وخت آک تا گد رینگارہ۔ ہچ آن ہچ اَلو اتون تا۔ مش تے ٹی نہار تیان بچنگ کن خت انا لٹ ہرفیرہ۔ توفک تا با پُر ئس۔ اوٹی سم شاغنگ بھاز سخت ئس۔

ننا دا دور اٹی سال آتا سفرک گھنٹہ غاتیٹی مریرہ۔ سفا، جوان، یخ ءُ دیر ملک ننے۔ کننگ کن مزہ دار انگا گڑاک اریر، اینو ڈکال مرے تو جہاز آتیٹی، ریل آتیٹی، گاڈی تیٹی ہر گڑا سر مریک۔ ہسپتال آک جوڑ مسر۔ کل ناجوڑی تا درمان مریک۔ وڑ وڑ انا داروک جوڑ ءُ۔ بندغ آک بھاز وخت اسکا زندہ مننگ کیرہ۔ گاڈی تیٹی، جہاز آتیٹی سفرک آسان مسر۔ چنکو وخت اسے ٹی بھاز کاریمک مننگ کیرہ۔ موبائل آتا، کمپیوٹر آتا وخت ءِ۔ داسہ دنیا نا کنج کنج انا بندغ آتتون ہیت مننگ کیک۔ ٹیکٹر، تریشر، مشین تا دور ءِ، انسان اینو آسرات مس۔ مست اسل خوار ئس۔ بجلی، شمسی تا بلف آک مست نا تارمئی تے چٹفیر۔ ننا دنیا ءِ ٹیکنالوجی روشنا کرے۔ انسان گدان و تمبو تیان، بلڈنگ آتے سر مس، باسنی تیان بچنگ کن پنکھہ و اے سی جوڑ کریر۔ خوا نا جاگہ غا فریج آک بسر۔ ٹیکنالوجی انسان تا زندگی ٹی بھلو آسراتی ایس۔

ٹیکنالوجی کاروبار آتے آسان کرے۔ انٹرنیٹ نا کمک اٹ نن دنیا نا بندغ آتیان کاریم ہلنگ کینہ۔ دنیا نا بھلا بھلا مارکیٹ آتا خبر تمک ننے۔ ننے بندغ اس تخوئی مرے تو ایڈورٹائزمنٹ نا کمک اٹ انٹرنیٹ آ نن اوفتے پاننگ کینہ۔

خواننگ مست بھاز کبین ئس، ولے اینو پگہ بھاز اڑزان مس۔ انٹرنیٹ ہم اسہ ماشٹر اسے۔ ماشٹر آک ملٹی میڈیا نا کمک اٹ گڑاتا پن تتون اوار اوار فوٹو تے ہم چناتے نشان ایترہ تاکہ زو پہہ مریر تا، چاک و بلیک بورڈ والا وخت ہنا۔ داسہ مارکر وائٹ بورڈ بس۔ اینو پگہ تو اونا ہم گرج مفک، یوٹیوب آ دنیا نا ٹیچر آک خوانفرہ، اگہ کس اس خواننگ خواہے تو خواننگ کیک۔ داسہ تو مشین آک انسان تا کاریم تے کننگ اٹی ءُ۔

اینو ہندا ٹیکنالوجی نا سوب آن بندغ آک ہر گڑا ءِ گوگل آ پٹ پول کیرہ۔ انتئے تینا مزغ آن کاریم ہلنگ افس۔ دن مف کہ مزغ آک کاریم اٹ بھاز بفننگ آن اسہ دے کاریم ءِ اِلر۔ ٹیکنالوجی نا سوب آن انسانک جان بڈ جوڑ مسنو۔ ہر بندغ بے واک ءِ۔ خڑک انا رشتہ غاتے خنپسہ، مر انا رشتہ پٹنگ بنا کرینے۔ دن کہ چراغ نا شیف آ تارمئی ءِ۔ انسان نا خنک خراب مننگ ءُ۔ بیماریک ودنگ ءُ۔ گرین ہاؤس گیس آک، تیل، کولا نا سوب آن ڈغار نا تنک آ لیم ”اوزون“ ءِ بھس کننگ ءُ۔ ہرانا سوب آن برف انا مشک دیر مریرہ۔ نوکاپ نا سوب مریرہ، مخلوق آک کہیرہ۔ سوردریاب نا دیرک بڑزا برور۔ دا کل ٹیکنالوجی نا سوب آن مرور۔ انسان تینے تینٹ کسفنگ ءِ و تینے تینٹ کھڈ اٹی بٹنگ ءِ۔

گڑا خدا خیر کے۔

بروک آ وخت اٹی ہوٹل آک آسمان تیان شیف مرور زمین آن بڑزا۔ انسان نا خن تیٹی مر اسکان خننگ کن لینز شاغور۔ اینو گاڈیک ڈغار نا زی آ ٹکر لگرہ۔ پگہ نا دے آسمان آن شیف ایکسیڈنٹ آک مرور۔ ناجوڑی تے مشین تیٹ پٹننگ آسان مرو۔ بندغ آک بھاز عمر کرور۔ کرپٹو کرنسی ٹی کاروبار آک مرور۔ خلق آتیٹی تولوک تولوک خواننگ ہیل کننگ آسان مرو۔ انسان آتا بولی اسہ بولی ٹی بدل مرو۔ ہر کس تینا بولی ٹی ہیت کرو، ولے بنوک آ تینا زبان اٹی بنو ءِ۔ کمپیوٹر آک دے پہ دے آن چنک مرسا کرور۔ موبائل آک وائی فائی آنبار چارج مرور یا ہندن ءُ موبائل جوڑ مرو چارج خواپرور۔ روبوٹ آک جوڑ مرور۔ انسان تیکن کل کاریم تے کرور۔ انسانک بیروزگار مرور۔

اینو ننے سوچوئی ءِ کہ ٹیکنالوجی ننا وخت ءِ بچفینے یا ننا وخت ٹیکنالوجی آ برباد مننگ ءِ؟ ننے موبائل ءِ اخس کاریم اٹ اتوئی ءِ؟ تینا وخت ءِ امر بچفوئی ءِ؟ انٹرنیٹ ہم اسہ بھلو دنیا اسے۔ ہرا گڑاتے ننے پٹوئی ءِ، بیرہ ہموفتے پٹن۔ دن مف کہ اسہ گھنٹہ نا کاریم اٹی ارا یا مسہ گھنٹہ خلین، اوڑے وخت ءِ تینا برباد کین۔ فیس بک بیرہ فوٹو راہی کننگ کن جوڑ متنے۔ ننا ورناک بس کیمرہ ہرفرہ و بیرہ فوٹوتے تینا ایترہ۔ دا جوان اف۔ انٹرنیٹ ءِ گرج آن زیات کاریم اٹ اتنگ خراب ءِ۔ پب جی گوازی ٹی اسل بھاز وخت برباد مریک۔ ای تو پاوہ بھلا گنوک ہمودے ہرا پب جی گوازی کیک۔ تینا گچین انگا وخت انا بلہ غاتے ہرفک۔ ٹیکنالوجی نا انت گڑاس ارے کل آن مست اونا بارو اٹ ننے علم مرے کہ اودے امر کاریم اٹ اتیرہ۔ گڑا اوکان پد نن اودے کاریم اٹ اتین۔ تینا مون، سٹی کاریم اٹ ایسن تو جوان ءُ بھرم اس دو بفرو۔ وخت بھاز نہادی و گچین ءُ گڑا اسے۔ دانا قدر ءِ کین۔دن مف کہ ٹیکنالوجی نا آسراتی انسان تیا کبین تمے۔

ہفتئی تلار

تاک: 36

19-25 September 2020

پنہ، 3