دے ٹِک ادبی دیوان مستونگ نا کنڈ آن ملک فیاض علی بلوچ نا شرفمندی ٹی مشاعرہ

گدرینگوک آ دے دے ٹِک ادبی دیوان مستونگ نا کنڈ آن پنی آ شاعر، ادیب، دانشور، صحافی، آماچ ادبی کاروان مستونگ نا چیئرمین خواجہ ملک فیاض علی بلوچ نا شرفمندی ٹی اسہ مشاعرہ اس اڈ تننگا۔ دا کچاری ٹی مستونگ نا شاعر ایب آتیان بیدس ایلو ادب دوست خواجہ غاتا ہم اسہ بھلو گونشت اس ساڑی ئس۔ 

مشاعرہ نا خاص انگا مہمان ملک فیاض علی بلوچ ئس۔ ہندن کچاری نا کماشی ءِ دے ٹک ادبی دیوان مستونگ نا صدر ہدایت فدا کرے۔ اعزازی مہمان رحیم ناز، عبدالحیات منصور، عبدالحمید محمد شہی، حمید عزیز آبادی، ملک ریاض علی بلوچ اسک ئسر۔ مشاعرہ نا بنا خدا تعالیٰ نا پن اٹ کننگا، شونکاری نا دود آتے دے ٹِک ادبی دیوان نا نائب صدر عبداللہ جوہر سر تس۔ 

مشاعرہ غان تران کرسا خاص انگا مہمان ملک فیاض علی بلوچ پارے کہ دے ٹِک ادبی دیوان مستونگ نا سنگت آتا بھاز منتوار اُٹ کہ اوفک کنا شرفمندی ٹی دا کچاری ءِ اڈ ترسا کنے زیات شرف بشخار۔ او پارے کہ دے ٹِک ادبی دیوان نا بنداو ءِ تخنگ تون دا تنظیم نا سنگت آک بھاز ترندی اٹ و مخ تفی اٹ علم و ادب نا پڑ آ گچین ءُ کڑدار ادا کننگ نا بناءِ کریر۔ او پارے کہ ننا ورنا شاعر ادیب خواجہ غاتے خدا تعالیٰ بھاز لائخی تسنے۔ داسہ اوفک تینا علم و قلم نا کمک اٹ زبان و ادب کن پین زیات خواری کرسا ادب نا دا نہال ءِ خرن کننگ کن خذمت کرسا کیر۔ او پارے کہ شاعر ادیب دانشور تینا علم و کمال اٹ تینا راج انا راہشونی کن جوان ءُ کڑدار ادا کننگ کیک۔ او پارے کہ آماچ ادبی کاروان نا کنڈ آن دے ٹِک ادبی دیوان نا سنگت آتتون ہر وڑ انا کمکاری کن تیار اُٹ۔ کنے بھاز خوشی مسنے کہ دے ٹِک ادبی دیوان نا سنگت آک اسہ پوسکن ءُ جوزہ اسے ٹی ادب نا پڑ آ گچینی اٹ خذمت کننگ ءُ۔

دا وخت آ آماچ ادبی دیوان نا جنرل سیکرٹری گچین آ شاعر ادیب محمد رحیم ناز تینا تران اٹی پارے کہ کنے بھاز خوشی مس کہ دے ٹِک ادبی دیوان نا سنگت آک دا گچین آ کچاری ءِ اڈ ترسا ننے شرف بخشار۔ او پارے کہ ای دعا کیوہ کہ خد اتعالیٰ دے ٹِک ادبی دیوان نا سنگت آتے زبان و ادب کن گچین وڑ اٹ خذمت کننگ نا توفیق ایتے۔ او پارے کہ شاعر ادیب نا کاریم ہم ہندادے کہ او است انا ہُب اٹ زبان و ادب نا شونداری و تالانی کن مخ ءِ تفسا خذمت کرسا کے۔

عبدالحیات منصور تینا تران اٹی دے ٹِک ادبی دیوان نا ادبی خذمت آتا ستا ءِ کرسا پارے کہ دے ٹِک ادبی دیوان نا سنگت آک اسہ گچین ءُ وڑ اسے ٹی علم و ادب نا پڑ آ ادبی خذمت آتا بنا ءِ کرینو۔ او پارے کہ ملک فیاض علی بلوچ نا شرفمندی ٹی دا کچاری نا اڈ تننگ ادب نا پڑ آ اسہ بھلو گام اسے۔ انتئے کہ تینا سینئر آ شاعر ادیب خواجہ غاتا عزت و شرف و اوفتا علم و لائخی تیان فائدہ ہرفنگ اسہ گچین ءُ جوزہ و خواری اسے نا درشانی ہم ارے۔ او پارے کہ شاعر ادیب دانشور راج انا اسہ زموار ءُ ٹولی اس ہم ارے، نن دعا کینہ کہ دے ٹِک ادبی دیوان سدائی سرسہبی نا مزل آتے دوئی کے۔

براہوئی و اردو نا گچین آ شاعر و ادیب ملک ریاض علی بلوچ تینا تران اٹی پارے کہ علم و ادب نا شونداری کن کاریم کننگ و زبان و ادب نا درستی راستی ہم دن انگا مجلس آتا اڈ تننگ آن زیات مستی کاہک۔ او پارے کہ دا ادبی کچاری ءِ اڈ تننگ آ دے ٹِک ادبی دیوان نا سنگت آتے مبارکبادی ایتوہ۔ ہندا اومیت ءِ ہم کیوہ کہ اوفک سدائی اخلاص و سچائی اٹ ادبی کڑدار ادا کرسا ادب نا پڑ آ مستی گام تخسا کرور۔ او پارے کہ شاعر ادیب راج انا خن پاننگک، او راج انا راہشونی کن جوان ءُ کڑدار ادا کننگ کیک۔ او پارے کہ کنے دا کچاری ءِ اڈ تننگ آن بھاز خوشی مسنے۔

پنی آ شاعر ادیب، راہشون ادبی دیوان نا عہدیدار حمید عزیز آبادی تینا تران اٹی پارے کہ ای دے ٹِک ادبی دیوان نا سنگت آتا منت وار اُٹ کہ اوفک کنے اعزازی مہمان نا شرف تسر۔ او پارے کہ علم و ادب نا شونداری کن کاریم کننگ ننا کل انا زمواری ہم ارے۔ او پارے کہ زند اٹی ہمو قومک زیات شون ہلکنو، ہرافک کہ تینا لمئی بولی و ادب کن گچینی اٹ خذمت کرینو۔ او پارے کہ دن انگا ادبی کچاری تا اڈ تننگ آن ادبی شونداری زیات مرسا کیک۔ او تینا ادبی ادارہ نا کنڈ آن سدائی کمکاری نا باور ہم کرفے۔

قبائلی و راجی شخصیت میر عبدالحمید محمد شہی ہم کچاری آن تران کرے، او پارے کہ دے ٹِک ادبی دیوان نا اڈ تروک آ کچاری ٹی ساڑی مرسا کنے زیات خوشی دو بس۔ انتئے کہ دے ٹِک ادبی دیوان علم و ادب نا شونداری کن اسہ بھلو جوزہ اسے ٹی ادبی خذمت سر تننگ ءِ۔ او پارے کہ شاعر ادیب راج انا اسہ ہندن ءُ ٹولی اسے ہرا کہ ایلو مخلوق ءِ زند انا کسر اٹ شون انا کند آ راہی روان کننگ کن تینا کڑدار ءِ ادا کرسا کیک۔ او دے ٹِک ادبی دیوان نا ادبی خذمت آتا ستا ءِ کرے۔

دے ٹِک ادبی دیوان مستونگ نا صدر ہدایت فدا تینا کماشکی تران اٹی پارے کہ دا کچاری ٹی ساڑی مروک آ شاعر ادیب و ادب دوست خواجہ غاتا منتوار اُٹ۔ او پارے کہ دے ٹِک ادبی دیوان علمی و ادبی ءُ کچاری اڈ ترسا زبان و ادب نا تالانی کن ہرا زمواری تے کوپہ غاتیا تخانے، خدا نا فضل اٹ دا تنظیم نا کل سنگت آک زبان و ادب نا شونداری کن سدائی مخ ءِ تفسا خذمت کرسا کیرہ۔ او پارے کہ اینو نا دا مشاعرہ پنی آ شاعر ادیب ملک فیاض علی بلوچ نا شرفمندی ٹی اڈ تننگانے، ہرا نن کن اسہ بختاوری اسے آن کم اف۔ او پارے کہ ملک فیاض علی بلوچ نا ادب کن کروک آ خذمت آک بھاز شرف کڑزرہ۔ انتئے کہ ملک صاحب سدائی ادب نا پڑ آ اسہ گچین ءُ جوزہ اسے ٹی خذمت کرینے۔ 

عبداللہ جوہر کچاری ٹی ساڑی سنگت آتا منت ءِ ہرفے و داڑتون اوار علم و ادب نا پڑ آ زیات گچینی اٹ ادبی کڑدار ادا کننگ نا گرج آتیا تینا خیال آتا درشانی ءِ کرسا پارے کہ زبان و ادب کن خذمت راج انا راہشونی کن شاعر ادیب آتا خذمت آک اسہ گچین ءُ کاریم اس تکنگرہ۔ او پارے کہ علم و ادب نا تالانی اٹ راج انا بندغ آتیٹی زیات شونداری و گچینی ہم ودی مریک۔ 

مشاعرہ ٹی ہرا شاعر ادیب آک تینا غزل آتے پیش کریر، اوفتا پنک دا وڑ اٹی ءُ:

رحیم ناز

ہر ہیت ءِ نی با انا تینا کشہ خلاسہ

نا ہیت زمانہ نا ترازو ٹی تخوک ءِ

ملک فیاض علی بلوچؔ اردو کلام اس بنفے

فتح محمد شادؔ

کرنو شتی دانکو سبوک

ہُر پلّو آ اونا تفوک

حمید عزیز آبادیؔ

گل و بال اٹے زیبا ڈغار

چکیں بلوچانی توار

عبداللہ جوہرؔ

سر و ساز آن تمانے

نخرہ و ناز آن تمانے

سعید احسانؔ

نمے وخت ملا ننے یات کیرے

نما است کشا ننے یات کیرے

عطاء انجمؔ

نت شپاد آ اے کنا دھرتی نا مل/

لتر اس کر نی کنا دا خن تے بین

ملک ریاض علی بلوچؔ

ننے بھاز مسنے نسخان سنگت

مفبو داخہ نم نادان سنگت

نذیر حسرتؔ

نی غور اٹ ہُرس تو ہر جاگہ دنیا ٹی خاخر لگوک ءِ

لمبہ و زراب ءِ صحرا ٹی دریاب اٹی خاخر لگوک ءِ

رحیم ویدنؔ

خلق شار اٹ بندغی اس دو برے

ایلمی کن ایلمی اس دو برے

حسین شہزادؔ

ننے ہر دور اٹی ریفینس سنگت

ننا تاریخ ءِ نی چپی کرینس

عادل محمودؔ

کردار ءِ نن گوہانک غازی ارین گفتار انا

سودا ءُ نک نن مثل اٹی ہڑدے انا اخبار انا

صلاح الدین شہزادؔ

است ہوغنگ ءِ ننا دا کِسہ غا

ہیت ٹکانے مفاد و پیسہ غا

ہدایت فداؔ

ہنوک آتے پٹن بروک آتا رندا ٹ

اسُل کوک کپن کہوک آتا رد اٹ

امجد بلوچؔ

گمان پین ءِ تران پین ءِ

تران اٹی نا زبان پین ءِ

سرور مہرؔ

زرہ اس سیبو رسینگتو است ءِ نا دا دوستی ٹی

کنا ساہ خنتوٹ مہر اس نے آن زندگی ٹی

منیر آفاقؔ

نما دڑد ءِ کسر تسن

گڑا است ءِ خبر تسن

ہفتئی تلار

تاک: 36

19-25 September 2020

پنہ، 3