وٹو نا وانگڑ

ہراڑے علم انا کمبوتی مرے، اوڑے بنداوی آ گڑاک غانڈ مریرہ۔ بندغ تینا ہیت آتے ٹی غنجل کنیک۔ سہب تے اسہ ہیت اسے آ چٹک، شام تے وا پین ہیت اسے آ ایسر مریک۔ اسل ہندن دن کہ بندغ اس ویل انا گواچی مرے تو اودے تینے آ پت مفک، گڑا ویل انا کٹفنگ کن سہب اتون اسٹ نا درگہ غا سلوک مریک، بیگہ تون ایلو بندغ نا۔ ہراڑتون وخت اس سلام دعا کتنے، اوڑا ہم کاہک۔ ہراڑان بد بریک تے خن تے ٹاپسا اودے ہم است انا حوال ءِ ایتک، ہندن ہرا سیاسی پارٹی نا مرے ہرا نظریہ نا بندغ اس مرے تینا کاریم کن کل ءِ گیرام کیک۔ دا بیرہ علم انا کمبوتی ءِ۔ ہرا بندغ ءِ خودغرض جوڑ کیک۔ داٹی بیرہ لس بندغ مفک، داٹی کماش آک ہم مریرہ۔ او راجی مریر یا سیاسی یا منصبداری سے نا خواجہ مریر۔ اوفتے دن انگا بندغ آتا آمخی آن فائدہ ہرفنگ نا چم آک بریرہ۔ دن انگا تے ”وٹو نا وانگڑ“ پارہ۔ ہرا اسہ جاگہ غا سلپک۔ بس تینا غرَز و بروک آ ویل ءِ مر کننگ کن ہڑدے بیش ءِ باوہ جوڑ کننگ آنبار زند ِ گدریفک۔ زند دن انگا بندغ آتا وخت اس ہم مفک۔ ہرا علم تخار، ویل انا سوب ءِ ہم پہہ مرور۔ ویل انا عمر آن ہم معلومدار مرور۔ صبر و سگ اٹی ہم بسن مرور۔ خاص وڑ اٹ اینو نا ورنا تینٹ خوانپک، ہرکس تون توس انت اس کہ بنگ ہمو ہیت ءِ مستی درسا کیک۔ نئے او ہیت ءِ کروک آنا مسخت ءِ پہہ مریک، نئے اونا است انا خل/ ءِ۔ نئے اونا نیت آن واخب مریک۔ بس دن چان دروشم نا میک اپ داسہ ہیت و خیال آتے ٹی ہم جاگہ کرینے۔ تانکہ دروشم اسے آ میک اپ لچوک ءِ دروشم زیبا ءِ۔ شیف کہ مس او بندغ نا کرنچ و داغ آک پاش مریرہ۔ ہیت و خیال آتا میک اپ ہمو تم شیف مریک ہراتم بنوک و خنوک آ بندغ علم اٹ اونا نثار ءِ پرغک۔ منہ بندغ اس دن ءُ مرور ہرا کچاری سے آن بش مریر کار، ہمو ہیت آ ٹک خلیر یا کتاب آتے ٹی ہمو سرحال ءِ خوانر، حقیقت آن معلومدار مریر۔ اینو پگہ بے سدھ و بے علم آ بندغ آتے سوشل میڈیا چریا جوڑ کرینے۔ اسہ ناجوڑی اسے آ ہڑدے اسہ پوسکن ءُ ڈاکٹر، حکیم اس پوسکن ءُ درمان اس پاہک، ہندن کہ ہر بندغ نا ویل انا سوب جتا ءِ، ہندن اسہ پن انا نادراخی نا سوب آک ہم جتا مریرہ۔ داخہ سیانڑا انگا بندغ آتا نیام اٹی، داخہ حکیم و ڈاکٹر آتا مننگ آن گڈ ہم نئے بندغ نا ویل آک چٹنگ اٹی ءُ، و نئے نادراخیک کٹنگ اٹی ءُ۔ دانا مطلب دادے کہ بندغ نا پہی ٹی خلنگ انگ اٹی ءِ۔ نا پہی ٹی آمخی تا گواچی مننگ اٹی ءِ۔ بس اگہ بندغ پہہ مس کہ ہرا گڑا ہرا جاگہ غا دکانداری مننگ اٹی ءِ۔ ہر بندغ ایلو ءِ آمخ جوڑ کننگ کن تینے لانچانے۔ مجال ءِ کہ ننا ہڑ و جنجال آک ایسر مریر۔ مجال ءِ کہ ہر در آ پیشانی ءِ تخنگ نا آہری گری ختم مرے۔ مجال ءِ بندغ بندغ نا مرے۔ ہراتم سیر مست آ بندغ تینا باخو اس ایلو ءِ روادار مف، او ہم لنگڑی سے نا گواچی مننگ کیک۔ داڑے ہر بندغ تینے مر چکک، تینا جان ءِ کشک۔ ویل و جنجال اسے نا مر کننگ کن ایلو نا درگہ ءِ نشان ایتک۔ تینے سفا تخنگ کن ایلو نا جوان انگا عمل ءِ عیبدار کیک۔ یا گڑا ”وٹو نا وانگڑ“ آتیا ہر اسٹ دو شاغنگ نا کوشست ءِ کیک۔ لغوشت آ خیال و لغوشت آ بندغ آتیان کس خیر خنانے، نئے خیر خنک۔ و نئے لغوشت آ خیال و بندغ آک تینا مریرہ۔ بس علم و جوان انگا علم، راست ءِ پاش کروک آ علم بندغ کن فیض انا سوب مریرہ۔ ہندن کہ پین انا پیسہ و منصب ایلو نا مفسہ۔ ہندن پین انا علم ءِ بننگ اٹ بندغ ءِ ہچ اس دو بفک۔ ہر بنوک آ، خنوک آ، علم و ہیت بندغ نا تینا عمل و علم انا پتنک ءِ ملنگ زند ءِ پہہ مننگ بندغ آتے درست کننگ جوان ءُ کسر اسے آ ہننگ مزل آ سر مننگ نا سوب جوڑ مریک۔ بندغ غانڈ و غنجل مننگ آن بچک۔

ہفتئی تلار

تاک: 36

19-25 September 2020

پنہ، 1