زند انا ساز

شرجیل کنا سنگت ءِ۔ 40 سال مست ای و او نیشنل کالج آف آرٹس نا طالب علم ئسن۔ شرجیل اٹی ہمے وخت آ ہم اسہ چنکو فلسفی اس ساڑی ئس۔ او تینا ہیت آتیٹ ننے ہمیش حیران کریکہ۔ اونا زندگی نا بارو اٹ فکر و خیال مدامی عملی مسکہ او گڑاتا عملی وجودآ باور کریکہ۔ ایلو گڑاتیان بیدس او گٹار خلنگ نا ہم شوقین ئس۔ ہرا وخت آ کہ نن شام اتون تینا اسائنمنٹ آتے پورو کرینہ، او تینا پنوک آ گٹار تون ہاسٹل نا چمنی نا یخ انگا بینچ آ توسکہ و گٹار نا چپ چوٹ ءُ سر ننے بنفیکہ۔۔۔۔۔

کنا تو سنگت ئس۔ ای اونا است ءِ پرغتوٹہ ولے ہاسٹل نا ایلو طالب علم آک اونا دا وڑ تیان تنک مسرہ او وارڈن آ ہنارہ تینا غاو ءِ ہم پاریرہ کہ شرجیل ءِ گٹار خلنگ آن توننگے۔ شرجیل اِرادے چپ کریکہ او مسٹمیکو دے ولدا او ئس و اونا گٹار۔۔۔۔۔۔

ہندن ننا این سی اے نا دیک گدرینگار و نن تینا بشخ آتیٹی عملی وڑ اٹ پترینگان۔۔۔ شرجیل آرٹ و ڈیزائننگ نا بشخ اٹی ماہر ئس۔ او کراچی آ ہنا و تینا بشخ اٹی بھلو بھلو کانٹریکٹ دوئی کرسا جوان پیسہ و پن کٹا۔۔۔

ای ہرا وخت آ کہ کراچی آ ہناٹہ تو شرجیل ءِ فون کریٹہ۔۔۔ نن ملانہ۔۔ و جوان دمچر کرینہ۔۔۔ شرجیل نا گٹار خلنگ نا شوق برجا ئس، ولے داسہ دا فرق بسوسس کہ داسہ متکن آ گٹار نا جاگہ ءِ الیکٹرونک گٹار ہلکوسس۔ ساز آتتون کنے است خواہی الو، ولے اونا شوق انا خاطر آن اودے بنگٹہ و تینا سرہ ءِ سرفیٹہ دن کہ ای ہم چس ہلنگ اٹی اٹ۔۔۔

ای کوئٹہ ٹی رہینگاٹہ۔۔ سرکاری نوکری الو ولے وخت اس کس اسینا پورٹریٹ، اسہ منظر یا اسکلپچر اس جوڑ کرسا تینا گزران و شوق انا پورواری ءِ کریٹہ۔

شرجیل کنے ملاکہ تو پاریکہ ”جاوید نی ہم کراچی آ بر۔۔ نے کن کاریم بھاز ءِ۔۔“

ولے ای اُراغان پیشن مننگ خواتوٹہ۔ ہندا خاطر آن دا سلہ عملی دروشم خنتو۔۔۔

اسہ دے اس شرجیل نا فون بس کہ ای کوئٹہ غا بسنٹ۔ نے تون ملنگ خواوہ۔۔ ای اودے پاریٹ کہ اراغا بر۔۔۔ جٹ اسے آن گڈ شرجیل تینا پوسکن آ ماڈل نا گاڈی ٹی کنا ارانا مون آ سلوک ئس۔۔ نن ملان۔۔ جوان گپ شپ مس۔ حال حوال مس۔۔۔

شرجیل ءِ ہر گڑا تون است خواہی ئس اوکہ کنا اراغا بسکہ تو بیٹھک اٹی تخوک آ ہر گڑا نا بارو اٹ جست و پڑس کریکہ۔ دا وار اونا نظر کنا شیلف اٹی تخوک آ ماﺅتھ آرگن آ تما۔ او اودے ہرفے و غوراٹ ہننگ ءِ بنا کرے۔ ماﺅتھ آرگن ہرے آن تخوک ئس ہندا خاطر آن اونا زی آ مش و گڑز انا اسہ لیم اس جوڑ مسوسس۔ شرجیل اودے سفا کرسا بھاز خوڑتی اٹ اونا جاچ ءِ ہلنگ اٹی ئس۔ ساز اتون ایہن اونا است خواہی بھاز ئس۔

”دا ماﺅتھ آرگن ءِ 40 سال مست کنا باوہ کنے گفٹ کریسس۔ نے خبرءِ کہ کنے موسیقی نا گڑاتتون است خواہی اف۔ ہندا خاطر آن داڑے تخوک ءِ۔“ ای اودے پاریٹ۔

شرجیل کنے آ خوڑت ہرا و مچے بشخندہ کرسا پارے:

”یار اگہ دا 40 سال اٹی نی ہڑدے 10 منٹ دا ماﺅتھ آرگن ءِ خلکسہ تو اینو نی بھلو ماﺅتھ آرگنسٹ اس مسسہ۔“

شرجیل اینو ہم کنے لاجواب کریسس۔

ہفتئی تلار

تاک: 30

01-08 August 2020

پنہ : 05