مولانا فضل الرحمن نا سیاسی بصیرت نا شرف ءِ کینہ، عسکری سرکڑدہ غاتیا ہیت کننگ وخت آ راستکی تے مون آ تخوئی تمک،میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ مولانا فضل الرحمن تون کنا ذاتی تعلقداریک عزت و شرف آ تالان ءُ و او اونا سیاسی بصیرت و آزموندہ نا شرف ءِ کیک ولے خیبرپختونخوا و بلوچستان نا حکومت ءِ بیٹ ترسا خاص وڑ اٹ دہشت گردی، قومی سلامتی و قومی و عسکری سرکڑدہ غاتابابت ہیت کننگ نا وخت آ راستکی، ریاست ءِ مون تروک چیلنج آتے دہشت گردی نا برخلاف برجا جہد ءِ مون آ تخنگ المی ءِ‘ راجی رابطہ نا سائٹ ایکس آ تینا اسہ کلہو اسے ٹی وزیراعلیٰ بلوچستان پارے کہ دا اسہ منوک ءُ راستکی اسے کہ مولانا فضل الرحمن و اونا جماعت تینٹ ہم دہشت گردی نا واقعہ غاتے ٹی شست مسنو‘ ہنداسوب آن اومیت کننگ مریک کہ او دا نازرک قومی ویل آ سلاہ تننگ وخت آ دہشت گردی نا برخلاف ریاستی کوشست آتے و سیکورٹی فورس آتا قربانی تے ہم یات تخنگے۔ خیبرپختونخوا و بلوچستان نا حکومت تا تقابلی جاچ ءِ ہلسا ہڑتوم آ صوبہ غاتیٹی دہشت گردی نا برخلاف گام گیج، سیاسی سرکڑدہ غاتا طرزِ عمل و عملی ارادگی ءِ مون آ تخوئی تمک۔ میر سرفراز بگٹی پارے کہ بلوچستان اٹی حکومت و اپوزیشن نا نیام اٹی سیاسی اختلاف آتیان پد ہم دہشت گردی نا برخلاف اسیجائی موقف قومی فائدہ غاتے اولیت تننگ نا اہم ءُ درور اسے۔