بھرمی تعلیمی ڈٹ بندی ادارہ غاتا کڑد اکن بھاز اہم مریک،پروفیسر ڈاکٹر عبدالرزاق صابر
داخلہ ٹیسٹ، امتحان، فیس آتا ہلنگ و اسکالرشپ نا بشخنگ نا کل ریسہ غاتیٹی شفافیت ءِ پک کننگے
گوادر، جامعہ گوادر اٹی اسپرنگ 2027 نا داخلہ ٹیسٹ، امتحان نا شیڈول، طالب علم آتا فیس آتا تننگ‘ اسکالرشپ چیک آتا بشخنگ نا وڑ و ڈول و تعلیمی کیلنڈر تون تعلقدار باندات آتا جاچ ءِ ہلنگ کن بڑزکو کہولی دیوان وائس چانسلر سیکرٹریٹ اٹی اڈ ہلک، ہرانا کماشی ءِ وائس چانسلر جامعہ گوادر پروفیسر ڈاکٹر عبدالرزاق صابر کرے۔ دیوان اٹی پرو وائس چانسلر پروفیسر ڈاکٹر منظور احمد، رجسٹرار ڈاکٹر دولت خان، کنٹرولر امتحانات ڈاکٹر رحیم مہر، ڈین سوشل سائنسز پروفیسر ڈاکٹر جان محمد، ڈین سائنس، انجینئرنگ اینڈ ٹیکنالوجی ڈاکٹر محب اللہ، تدریسی بشخ آتا چیئرپرسن تتون اوار تعلقدار انتظامی افسرآک بشخ ہلکر۔ دیوان اٹی اسپرنگ 2027 نا داخلہ غاتا رد اٹ انٹری ٹیسٹ اڈ تننگ نا تیاری تیا و وڑ و ڈول آ جم سجفنگا‘ شریدار آتے معلومدار کننگا کہ امتحان تا شیڈول دسمبر 2026ء نا گڈیکو ہفتہ ٹی تخنگک۔ داکان بیدس طالب علم آتا وخت آ فیس تننگ‘ اسکالرشپ چیک آتا شفاف و منظم بشخ وپانٹ کننگ نا وڑوڈول و جامعہ نا اکیڈمک کیلنڈر و اونا شیڈول نا ہم جاچ ءِ ہلنگا۔ دیوان اٹی تعلیمی و انتظامی سرجز آتے پک وخت اٹ پورو کننگ، امتحانی و داخلہ باندات آتے تی بھرمی رابطہ کاری و طالب علم آتے مون تروک ویل آتا ایسری کن سلاہ تننگا۔ شریدار آک دا ہیت آ امنا کریر کہ تعلیمی کیلنڈر آ بھرمی عملدرآمد و کل تعلقدار باندات آتا وخت آ پوروی ءِ پک کننگک۔ دا وخت آ وائس چانسلر پروفیسر ڈاکٹر عبدالرزاق صابر تعلقدار افسر و بشخ آتے پارت کرے کہ داخلہ ٹیسٹ، امتحان، فیس ہلنگ و اسکالرشپ تننگ نا کل ریسہ غاتے شفافیت، نظم و ضبط و پک ضابطہ نا رِد اٹ پورو کننگے۔ او پارے کہ بھرمی تعلیمی ڈٹ بندی، وخت آ فیصلہ و ادارہ ئی کمکاری طالب علم آتے گچین تعلیمی آسراتی فراوان کننگ و جامعہ نا جم کارکڑد ءِ پین گچین جوڑ کننگ اٹی اہم ءُ کڑد اس ادا کیرہ۔