پاکستان نا امن و سوگوی ءِ نسخان رسیفنگ نا کوشست آک سرسہب مفسہ،شاہد رند

کوئٹہ، وزیراعلیٰ بلوچستان میر سرفراز بگٹی نا سلاہکار حوالکاری و سیاسی باندات شاہد رند ضلع کوئٹہ نا علاقہ ٹی بھارتی کاٹم خواجہی ٹی کاریم کروک دہشت گرد آتا برخلاف سیکیورٹی فورس آتا سرسہب انٹیلی جنس بیسڈ کارروائی تاستاءِ کرسا پارینے کہ دہشت گردی نا بیخ ءِ کشنگ و ملک اٹی مدامگی کن سیکورٹی فورس آتا کسبی لائخی‘ بیداری و ارادگی ستا کڑزک۔ تینا اسہ بیان اسے ٹی شاہد رند پارے کہ 3 نومبر آن برجا انٹیلی جنس بیسڈ آپریشن تے ٹی فتنہ الخوارج و فتنہ الہندوستان نا دہشتگرد ہند آتے بھرمی وڑ اٹ شست کننگا، وخت اس کہ کارروائی تے ٹی دہشتگرد آتا چٹفنگ تون اوار اوفتا ہند آتیاں سلہہ، منچر ہم دوئی کننگا۔ او پارے کہ بھارتی کاٹم خواجہی ٹی پاکستان نا امن و سوگوی ءِ نسخان رسیفنگ نا کوشست آک ہچ گہس سرسہب مفسہ۔ سیکیورٹی فورس و کانود نافذ کروک ادارہ غاک ملک دشمن آتا ناپاک ارادہ آتے بے سہب کننگ و دہشت گردی نا پورو چٹفنگ کن پبی واک اتون کارروائی کننگ ءُ۔ شاہد رند پارے کہ قومی ایکشن پلان نا رد اٹ بنجائی ایپکس کمیٹی نا منظور کروک وژن عزمِ استحکام نا رِد اٹ دہشت گردی نا برخلاف برجا کارروائیک قومی سلامتی نا رکھ و مدامگی امن نا کنڈ آ اہم پیشرفت اسے ءُ۔ او دا ارادگی نا درشانی ءِ کرے کہ دہشت گردی نا پورو چٹفنگ اسکان سیکورٹی فورس و کانود نافذ کروک ادارہ غاتا کارروائیک برجا سلرہ و ملک دشمن آتے تینا ناپاک مسخت آتیٹی سرسہب مننگ کن النگپک۔