سیاست جم پامداری نا کمک اٹ شونداری نا عمل ءِ پارہ، گورنربلوچستان

کوئٹہ، گورنر بلوچستان شیخ جعفر خان مندوخیل پارینے کہ سیاست اصل اٹ السی حق و واکداری تاعملدرآمد و اسیجائی حکمت عملی نا کمک اٹ تعمیر و شونداری نا عمل ءِ مونی دننگ نا پن ءِ۔ اسہ سیاستدان اسے نا عظمت، سوبری و سیاسی بیداری نا حقی آب الس تون اونا دراست تعلقداری، سیاسی کلہو و جمہوری قدر آتا شون اٹی ڈکوک ءِ۔ دا خیال آتا درشانی ءِ او جمعہ نا دے گورنر ہاؤس کوئٹہ ٹی جتاجتا ضلع غاتیان بروک ڈل آتتون ہیت وگپ کرسا کرے۔ دا وخت آ گورنر بلوچستان شیخ جعفر خان مندوخیل پارے کہ وخت انا خواست ءِ کہ نن بغض، بدگمانی و غلط فہمی تا دیوال تے بٹسا مہر، پت و پامداری نا پول تفن، ہراڑکن راج انا ہر باشعور آ بندغ ءِ تینا مثبت و تعمیری کڑد ءِ ادا کروئی تمک تاکہ بھیم، بے اعتمادی و بدبیسئی نا چاگڑد ءِ چٹفسا تین پہ تینی رابطہ غاتیٹی مروک مُری تے کم کننگ مرے۔