ریکوڈک ڈٹ پاکستان اٹی معدنی زرکاری کن بے مٹ ءُ آب اس پک کیک،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ پاکستان قدرتی وسیلہ و معدنی مڈی تیاں شُپ ءُ ملک اسے، دا وسیلہ غاتے بھرمی وڑ اٹ کاریم اٹ اتسا بلوچستان نا شونداری، الس نا آسودہی و روزگار نا پوسکن آ وارخواہی تا ودی کننگ حکومت نا اولیکو اولیت آتیٹی اوار ءِ۔ ریکوڈک کون آ بھلا ڈٹ آتیان بلوچستان نا الس کن روزگار، کسبی چاہنداری و زرگزرانی شونداری نا پوسکن ءُ گمان ودی مریرہ وخت اس کہ دا ڈٹ انا سرسہبی پاکستان اٹی آخبت نا معدنی زرکاری کن اسہ دروری ءُ آب اس جوڑ کیک‘ وزیراعظم محمد شہباز شریف تون بیرک مائننگ کارپوریشن نا چیئرمین جان تھورنٹن نا کماشی ٹی ڈَل اوڑدہی کرے، ہراٹی پاکستان نا معدنی وسیلہ تیاں فائدہ ہرفنگ، ریکوڈک ڈٹ انا پیشرفت و معدنی بشخ اٹی زرکاری نا گمان تیا گپ وتران کننگا۔ اوڑدہی ٹی وزیراعظم پارے کہ بلوچستان نا الس ءِ معدنی ڈٹ آتا بھرم اٹی دراست شریک کننگ، ہندی ورنا تیکن روزگار و کسبکاری نا وارخواہی تا ودی کننگ و ڈٹ انا کیب اٹی آباد آبادی تا شونداری ءِ پک کننگ حکومت نا اولیت آتیٹی اوار ءِ۔ او پاکستان منرلز انویسٹمنٹ فورم اٹی بیرک مائننگ کارپوریشن نا بشخ ہلنگ نا ستاءِ کرسا پارے کہ ریکوڈک ڈٹ پاکستان نا معدنی بشخ اٹی زرکاری نا اہم ءُ مزل نا نشان اسے و ملکی زرگزرانی آخبت کن بھاز اہمیت تخک۔ دا ڈٹ انا سرسہبی بیرہ بلوچستان آخا بلکہ ملک اٹی آخبت نا معدنی ڈٹ آتیکن ہم اسہ درور اس مریک‘ وزیراعظم پارے کہ پاکستان تینا تالان معدنی وسیلہ غاتے کاریم اٹ اتنگ و جہانی زرکاری کن پوسکن ءُ وارخواہی ودی کننگ کن سنبرینگوک ءِ۔ معدنی بشخ انا شونداری کن حکومت واپاری‘ زرکاری، بنداوی پنجر و پوسکنوڑ ٹیکنالوجی آ تالان گچین چاگڑد ٹہیفنگ اٹی ءِ۔ اوڑدہی ٹی پاکستان نا معدنی بشخ اکن جوان پالیسی، ضابطہ ئی نظام و بنداوی پنجر نا فراوانی نا رد اٹ باندات آتیا ہم گپ وتران کننگا۔ وزیراعظم ریکوڈک ڈٹ اتون اوار پاکستان نا ایلو معدنی وسیلہ غاتا شونداری کن ہم بیرک مائننگ کارپوریشن نا چاہنداری و آزموندہ غاتیان ہرفنگ نا استخواہی نا درشانی ءِ کرے۔ دا وخت آ بیرک مائننگ کارپوریشن نا ڈَل پاکستان منرلز انویسٹمنٹ فورم نا اڈ تننگ ءِ ملک اٹی معدنی بشخ انا شونداری نا کنڈ آ اہم گام گوندسا وزیراعظم و حکومت پاکستان نا کوشست آتا ستاءِ کرے۔ ڈَل کراچی و گوادر اٹی معدنی پراسیسنگ نا صنعت جوڑ کننگ کن زرکاری ٹی است خواہی نا درشانی ءِ ہم کرے، ہراڑان ملک اٹی معدنی وسیلہ غاتا پراسیسنگ و تعلقدار صنعتی سرجز آتا شون انا گمان تیا ہیت ءِ مونی دننگ نا کسر آوار مس۔ دیوان اٹی نائب وزیراعظم و وزیر خارجہ سینیٹر اسحاق ڈار، بنجائی وزیر محمد اورنگزیب و علی پرویز ملک، خصوصی کمکار طارق فاطمی و لیفٹیننٹ جنرل (ر) محمد ظفر اقبال تون اوار تعلقدار بڑزکو کہولی کمامدار آک بشخ ہلکر۔