دہشت گردی نا برخلاف سیکورٹی فورس آتا سرسہب کارروائی ستاکڑزک،وزیراعلیٰ بلوچستان

کوئٹہ، وزیراعلیٰ بلوچستان میر سرفراز بگٹی صوبہ ٹی بھارتی کاٹم خواجہی ٹی کاریم کروک فتنۃ الخوارج و فتنۃ الہندوستان نادہشتگرد آتا برخلاف سیکورٹی فورس آتا سرسہب انٹیلی جنس بیسڈ کارروائی تا ستاءِ کرساپارینے کہ دہشت گردی نا چٹفنگ و ملک اٹی مدامگی امن کن سیکورٹی فورس و کانود نافذ کروک ادارہ غاتا کوشست آک ستاکڑزرہ۔ وزیراعلیٰ ہاؤس آن جاری بیان اٹی اوپارے کہ انٹیلی جنس معلومداری نا بنداو آ جاری کارروائی تیٹی دہشت گرد آتا چندی جاگہ غاتے گچین وڑاٹ شست کننگا وخت اس کہ دہشت گرد آتا چٹفنگ تون اوفتا جاگہ غاتیان سلہہ، منچر ہم دوئی کننگا۔ وزیراعلیٰ پارے کہ بھارتی کاٹم خواجہی ٹی پاکستان اٹ بے ایمنی تالان کننگ و قومی سلامتی ءِ نسخان تننگ نا سازش آتے اسُل سرسہب مننگ کن الیپنہ۔ پاکستان نا سیکورٹی فورس و کانود نافذ کروک ادارہ غاک ملک دشمن آتا پراگندہ ارادہ غاتے بے سہب کننگ و دہشت گردی نا پورو چٹفنگ کن پورو وڑاٹ متحرک ءُ۔ اوپارے کہ قومی ایکشن پلان نا رداٹ بنجائی ایپکس کمیٹی نا منظور کروک وژن عزم استحکام نا رداٹ دہشت گردی نا برخلاف برجا کارروائی مربوط قومی حکومت عملی نا بشخ ءِ۔ دہشت گردی نا چٹفنگ کن ریاستی ادارہ غاتا نیام اٹ گچین رابطہ و اسیجائی کوشست المی ءِ۔ وزیراعلیٰ بلوچستان دا ارادگی نا درشانی ءِ کرے کہ دہشت گردی نا پورو چٹفنگ و ملک اٹ مدامگی امن اسکان سیکورٹی فورس و کانود نافذ کروک ادارہ غاتا کارروائی برجاسلک۔ اوپارے کہ ملک دشمن آتا برخلاف مچ آ قوم و ریاستی ادارہ غاک اسیجا ءُ۔ بلوچستان تون اوار مچ آملک اٹی امن و سوگوی ننا اسیجائی قومی ارادگی ءِ۔