پردیسی پاکستانیک ملک انا نہادی قومی میرات ءُ، اہم تکنگک تا،ڈپٹی چیئرمین سینٹ

اسلام آباد، ڈپٹی چیئرمین سینٹ سیدال خان ناصر پارینے کہ پردیسی پاکستانیک ملک انا نہادی قومی میرات ءُ و ملکی زرگزران نا سوگوی و شونداری ٹی اوفتا کڑد بھاز اہم ءِ، پیشن ملک رہینگوک پاکستانی تا راجی آسودہی، ویل آتا ایسری و اوفتے آسراتی تا فراوانی حکومت نا اولیت آتیٹی اوار ءِ۔ جمعہ نادے آ سینٹ سیکرٹریٹ آن جاری پریس ریلیز نا رداٹ داخیال آتا درشانی ءِ او مسلم لیگ (ن) جاپان نا صدر ملک نور اعوان تون اوڑدہی ٹی ہیت وگپ کرسا کرے۔ او پارے کہ جاپان اٹی پاکستانی ہیومن ریسورس کن روزگار نا گیشتر وارخواہی ساڑی ءِ، دامسخت کن ورناتے جاپانی بولی و پوسکن آ فنی کسب آتا ہیلکاری فراوان کننگ نا گرج ءِ۔ ڈپٹی چیئرمین سینٹ پارے کہ پاکستان و جاپان نا نیام اٹ واپار، زرکاری، صنعتی ٹیکنالوجی و تعلیمی کمکاری ءِ مونی درسا شونداری نا پوسکن وارخواہی ودی کننگ مریک۔ اوڑدہی ٹی داہیت آ ہم گپ وتران مس کہ جاپان اٹی پاکستانی ورناتیکن حوالکاری ٹیکنالوجی، صنعتی و تکنیکی بشخ آتیٹی روزگار نا گیشتر گمان ساڑی ءِ۔ داکان بیدس ڈپٹی چیئرمین سینٹ تون ڈپلومیٹک فٹ بال لیگ انا بانی مبشر سنجرانی ہم اوڑدہی کرے و اودے ڈپلومیٹک فٹ بال لیگ سیزن 10 انا بنائی دود اٹی خاص انگا مہمان نا وڑ اٹ بشخ ہلنگ نا سلہ خلک۔ سیدال خان ناصر پارے کہ گوازی جہانی سنگتی، دودوربیدہ ئی ہم گرنچی و السی رابطہ غاتا مونی دننگ نا گچین وڑ ءِ، ڈپلومیٹک فٹ بال لیگ کون آ سرجزآک ستاکڑزرہ۔ ڈپلومیٹک فٹ بال لیگ سیزن 10 انا بنائی دود 13 نومبر آ موون پک ہوٹل اسلام آباد اٹی مریک۔ داکان پد بلوچستان تون تعلقدار صحافی تا ڈل اس ہم ڈپٹی چیئرمین سینٹ تون اوڑدہی کرے ہراٹی صحافی تے مون تروک ویل و بلوچستان نا شونداری نا بابت باندات آتیا گپ وتران کننگا۔ داوخت آ سیدال خان ناصر پارے کہ صحافت جمہوری راج انا اہم تمبہ ءِ، صحافی تے مون تروک کسبی ویل آتا ایسری و اوفتے گچین چاگڑدنا فراوانی المی ءِ۔ اوپارے کہ بلوچستان تون اوار کل صوبہ غاتا بریبر شونداری، الس ءِ بنداوی آسراتی تا فراوانی و شونداری ڈٹ آتا وخت آ پوروی المی ءِ۔