سیکورٹی فورس آتا ورناک ملک دشمن آتے مش تا کننگ اٹ لگوک ءُ،صدر مملکت/وزیراعظم

اسلام آباد، وزیراعظم محمد شہباز شریف کرم اٹی بھارتی کاٹم خواجہی ٹی کاریم کروک فتنۃ الخوارج و فتنۃ الہندوستان نا دہشت گرد آتا برخلاف انٹیلی جنس بیسڈ آپریشن اٹی 31 دہشت گرد آتے دوزخی کننگ آ سیکورٹی فورس آتا افسر و ورناتے خراج تحسین پیش کرینے۔ وزیراعظم آفس نا میڈیا ونگ آن جاری بیان نا رداٹ وزیراعظم آپریشن اٹی دہشت گرد آتا چندی ہند غاتے گچین وڑاٹ بھس کننگ و بھلو کچ اسے ٹی سلہہ، منچر دوئی کننگ آ سیکورٹی فورس آتا کسبی چاہنداری و جیرت نا ستاءِ کرے۔ وزیراعظم شہباز شریف پارے کہ سیکورٹی فورس آتا ورناک ملک دشمن آتا ناپاک ارادہ غاتے مش تا کننگ کن دے و نن لگوک ءُ، و نیشنل ایکشن پلان نا رداٹ ملک آن درملکی کاٹم خواجہی ٹی مروک دہشت گردی نا پورو چٹفنگ اسکان دا جنگ پورو واک اٹ برجا سلک۔ صدر مملکت آصف علی زرداری خیبرپختونخوا ٹی دہشت گرد آتا برخلاف سرسہب انٹیلی جنس بیسڈ آپریشن اٹی 31 دہشت گرد ءِ خلنگ آ سیکورٹی فورس آتے خراج تحسین پیش کرینے۔ جمعہ نادے آ ایوان صدر نا پریس ونگ آن جاری بیان نا رداٹ صدر مملکت پارے کہ دہشت گردی نا برخلاف جنگ اٹی سیکورٹی فورس آتا پدریسہ سرسہبی قومی ارادگی و کسبی لائخی تا درشانی ءِ۔ اوپارے کہ پاکستان نا سلامتی ءِ نسخان تننگ کن پیشن نا کاٹم خواجہی ٹی کاریم کروک دہشت گرد آتا برخلاف کارروائی تے برجاتخنگے۔ صدر مملکت پارے کہ دہشت گرد آتیان سلہہ، منچر دوئی کننگ سیکورٹی فورس آتا گچین کارروائی نا شاہدی ءِ۔ صدر آصف علی زرداری پارے کہ فتنۃ الخوارج و فتنۃ الہندوستان نا پیشن نا کاٹم خواجہی ٹی کاریم کروک دہشتگرد نیٹ ورک آتا پورو چٹفنگ قومی سلامتی نا خواست ءِ۔ اوپارے کہ پاکستان نا امن و سوگوی ءِ نسخان تروک آ پیشن نا کاٹم خواجہی ٹی کاریم کروک دہشتگرد آتا ارادہ ءِ سرسہب مننگ کن النگ پننگک۔