دہشت گرد آتے تینے ڈکنگ کن جاگہ ملپک، بنجائی وزیر داخلہ

اسلام آباد، بنجائی وزیر داخلہ محسن نقوی بلوچستان و خیبرپختونخوا ٹی بھارتی کاٹم خواجہی ٹی کاریم کروک دہشتگرد آتا برخلاف سرسہب آپریشن تیا سیکورٹی فورس آتے خراج تحسین پیش کرسا پارینے کہ ہڑتوم آ صوبہ غاتیٹی دہشتگرد آتے تینے ڈکنگ کن ہچ ءُ جاگہ اس ملپک۔ جمعہ نادے آ وزارت داخلہ غان جاری بیان نا رداٹ وزیرداخلہ دہشت گرد آتا ناپاک ارادہ غاتے بے سہب کننگ آ سیکورٹی فورس آتا کسبی لائخی و بھلا جیرت نا ستاءِ کرے۔ اوپارے کہ بھلو کچ اسے ٹی دہشت گرد آتے دوزخی کننگ آ او سیکورٹی فورس آتے سلام پیش کیک انتئے کہ فورس آتا بہادر گلزادہ غاک مچ آ قوم انا میرات ءُ۔ بنجائی وزیرمحسن نقوی دا ارادگی نا درشانی ءِ کرے کہ سیکورٹی فورس آک ملک آن بھارتی سپانسرڈ دہشتگرد آتا پورو چٹفنگ کن سنبرینگوک ءُ و مچ آ قوم دہشت گردی نا برخلاف دا جنگ اٹی تینا سیکورٹی فورس آتتون سوگوی اٹ سلوک ءِ۔