ربیع سیزن اٹی ٹیل انا کشارگر تسکان دیر رسیفنگ ءِ پک کننگے،صلاح الدین نورزئی

نصیرآباد، کمشنر نصیرآباد ڈویژن صلاح الدین نورزئی تون چیف انجینئر کینالز قربان علی جتوئی اونا دفتر اٹی اوڑدہی کرے۔ دا وخت آ سپرنٹنڈنگ انجینئر ایریگیشن سرکل مدثر ظفر کھوسہ، ایس ایس پی نصیرآباد اسد ناصر، ایگزیکٹو انجینئر پٹ فیڈر کینال شمس الملک بادینی و ایگزیکٹو انجینئر کچھی کینال الہی بخش گاجانی ہم ساڑی ئس۔ اوڑدہی ٹی ربیع سیزن اٹی وسمی آ علاقہ غاتا کشارگر آتے کشاری دیر انا انصاف اٹ فراوانی، نہری نظام نا بحالی و جوڑجاڑ و آبی وسیلہ غاتا گچین کاریم اٹ اتنگ تون اوار ایلو تعلقدار باندات آتیا جم سجفنگا۔ دا وخت آ کمشنر نصیرآباد ڈویژن صلاح الدین نورزئی ہیت وگپ کرسا پارے کہ نصیرآباد ڈویژن بلوچستان نا کل آن وسمی انگا کشاری ڈیہہ ءِ و ملکی کنشت نا گرج آتے پورو کننگ اٹی اہم کڑد ادا کننگ اٹی ءِ۔ او محکمہ آبپاشی نا کمامدار آتیا زور شاغا کہ ربیع سیزن اٹ ٹیل انا کشارگر آتسکان دیر انا رسینگ گیگ ءِ امر کہ مرے پک کننگے تاکہ خولم و ایلو ربیع فصل آتا کشت و کشار زہمی مف۔ او مستی پارے کہ وا تا سفائی، پشتہ غاتا سوگوی و دیر دُزی نا توننگ کن بھرمی و عملی گام گیج کننگے و دا رد اٹ ہچ وڑ انا ڈیوالئی یا بے پرواہی سگنگ مفک۔ چیف انجینئر کینالز قربان علی جتوئی و ایلو افسرآک کمشنر نصیرآباد ءِ پٹ فیڈر و کچھی کینال تون اوار ڈویژن نا ایلو نہری نظام اٹی دیر انا ساڑی حالیت و برجا شونداری و جوڑجاڑی کاریم تا بابت جم بریفنگ تسر۔ او باور کرفیر کہ ربیع سیزن اٹی کشارگر آتے مون تروک ویل آتا دمدستی ایسری و دیر انا انصاف اٹ بشخ و پانٹ اکن کل دوئی وسیلہ غاتے کاریم اٹ اتنگک۔ دا وخت آ ربیع کینال اٹی دیر انا فراوانی نا بابت خواری مونی تروئی تمنگ اٹی ءِ ولے ننا پبی کوشست مریک کہ کل خواری و تکلیف تے ایسر کننگے۔