علامہ اقبال شاعر اسے تون اوار اسہ بھلو مفکر، فلسفی و عظیم راہشون اس ئس،فریدہ ترین

صحبت پور، یومِ اقبال نا وخت آ گورنمنٹ بوائز انٹر کالج صحبت پور اٹی شاعرِ مشرق، مفکرِ پاکستان ڈاکٹر علامہ محمد اقبال نا قومی، علمی، ادبی و فکری خذمت آتے خراجِ عقیدت پیش کننگ کن اسہ شرفدار ءُ دود اس اڈ تننگا۔ ہراٹی ڈپٹی کمشنر صحبت پور فریدہ ترین خاص انگا مہمان نا وڑ اٹ بشخ ہلک۔ دود اٹ کالج نا پرنسپل پروفیسر غلام شبیر چنہ، استاد، طالب علم و ایلو تعلقدار شخصیت آک ہم بشخ ہلکر۔ دود اٹ طالب علم آک شاعرِ مشرق ڈاکٹر علامہ محمد اقبال نا زند و خذمت، اونا شاعری، فکر و فلسفہ و خاص وڑ اٹ فلسفہ خودی ءِ پیدوار کننگ کن بھاز زیبا زہمی کروک تران‘ ملی نغمہ و جتا ادبی و تعلیمی پروگرام تے پیش کریر۔ طالب علم آک تینا خیال و تخلیقی لائخی تا کمک اٹ علامہ اقبال نا کلہو ءِ بھرمی وڑ اٹ پیدوار کریر و ساڑی بندغ آتیاں داد ہلکر‘ دا پروگرام نا بنداوی مسخت پوسکن آ چین اٹی اقبال شناسی، قومی شعور، تینے آ پتداری و وطن تون مہر انا جوزہ ءِ شون تننگ ئس۔ دا وخت آ ڈپٹی کمشنر صحبت پور فریدہ ترین تینا تران اٹی علامہ محمد اقبال نا زند، اونا علمی و ادبی خذمت، فکری جہد و برصغیر نا مسلمان تے ٹی بیداریِ شعور ودی کننگ نا بابت اونا تاریخی کڑد آ جم ہیت کرے‘ او پارے کہ علامہ اقبال بیرہ اسہ بھلو شاعر اس آخا بلکہ اسہ بھلو مفکر، فلسفی و عظیم راہشون اس ئس، ہرا تینا شاعری و فکر انا کمک اٹ مسلمان تے خودی، خودداری، سیوت، عمل و جہد انا سبخ تس۔ اونا فکر برصغیر نا مسلمان تے ٹی اسہ پوسکن ءُ فکر اس و جتا قومی تشخص نا احساس ودی کننگ اٹی اہم کڑد ادا کرے‘ او پارے کہ علامہ اقبال نا فلسفہ خودی اصل اٹ انسان ءِ تینا لائخی تے مون آاتنگ‘ تینے آ پت کننگ، خواری تتون مون تننگ و تینا مزل نا دوئی کننگ کن پدریسہ جہد کننگ نا کلہو ایتک۔ اقبال ورنا تے شاہین کون آ بڑز بال، بڑز حوصلہ، خودداری و عملی زند اٹی مونی ہننگ نا پارت کیک۔ اونا کلہو اینو ہم ہموخس اہم و بھرمی ءِ اخس اونا دور اٹی ئس۔ ڈپٹی کمشنر مستی پارے کہ ورناک قوم اسے نا نہادی مڈی و روشنا آخبت مریرہ۔