حکومت نا گام گیج آتا بھرم ءِ حقدار آتسکان رسیفنگ ننا زمواری ءِ،ماریہ شمعون

اوستامحمد، اسسٹنٹ کمشنر اوستامحمد ماریہ شمعون تون ڈائریکٹر بینظیر انکم سپورٹ پروگرام عبدالرحیم بلوچ اوڑدہی کرے۔ اوڑدہی نا وخت آ حکومت پاکستان نا کنڈ آن غریب، بیوس و حقدار زالبول آتے مالی کمک نا فراوانی کن برجا گام گیج و بینظیر انکم سپورٹ پروگرام نا رد اٹ فراوان کروک مالی کمک نا چندی پہلو تیا جم گپ وتران کننگا۔ دا وخت آ ڈائریکٹر بینظیر انکم سپورٹ پروگرام عبدالرحیم بلوچ پارے کہ حکومت نا بنداوی مسخت راج انا حقدار و کم کٹیا کروک تپہ تون تعلقدار زالبول آتے مالی رکھ فراوان کننگ و اوفتے مون تروک زرگزرانی خواری تیٹی ریلیف تننگ ءِ۔ ننا پبی کوشست ءِ کہ حکومت نا کنڈآن فراوان کروک مالی کمک حقی حقدار زالبول آتسکان شفاف و انصاف اٹ سر مرے و دا عمل اٹ اوفتے ہچ وڑ انا فریشانی، بے گرج تل ول یا اڑاند مون تروئی تمپ۔ او مستی پارے کہ دا مسخت نا دوئی کننگ کن حقدار زالبول تا راہشونی، کمکی پیسہ غاتا وخت آ تس و غاو تا ایسری ءِ پک کننگ ننا اولیکو اولیت آتیٹی اوار ءِ۔ دا رد اٹ ضلعی انتظامیہ نا کمکاری بھاز اہم ءِ تاکہ تین پہ تینی رابطہ و بھرمی حکمت عملی نا کمک اٹ کمکی پروگرام ءِ پین گچین و فعال جوڑ کننگ مرے۔ اسسٹنٹ کمشنر اوستامحمد ماریہ شمعون دا وخت آ ضلعی انتظامیہ نا کنڈ آن پورو کمکاری نا باور کرفسا پارے کہ حکومت نا فلاحی گام گیج آتا بھرم حقی حقدار آتسکان رسیفنگ ننا کل انا اسیجائی زمواری ءِ۔ ضلعی انتظامیہ دا بابت وس انا کچ آ کمک فراوان کیک تاکہ حقدار زالبول آتے مالی کمک نا دوئی مننگ اٹ آسانی مرے و شفافیت اٹ اوفتے اوفتا حق رسینگے۔