بلوچستان اٹی بے روزگاری نا چٹفنگ کن گام گیج نا گرج ءِ، سردار محمد عمر گورگیج

کوئٹہ، پاکستان پیپلزپارٹی بلوچستان نا صوبائی صدر سینیٹر سردار محمد عمر گورگیج کورکمانڈر بلوچستان لیفٹیننٹ جنرل عنایت حسین نا کنڈآن سیمی واپار نا مونی دننگ و بارڈر ءِ آسان، منظم و گچین جوڑ کننگ نا وژن و گام گیج آتے بلوچستان نا زرگزرانی شونداری نا بابت اہم گوندا۔ اسہ بیان اسے ٹی سینیٹر سردار عمرگورگیج پارے کہ کورکمانڈر بلوچستان نا کنڈآن صوبہ نا ڈغاری راستکی، السی ویل و زرگزرانی گرج آتے سرپند مرسا عملی گام گیج آتا وژن چکار نا قابل ءِ بلوچستان اٹی بے روزگاری، نیزگاری و زرگزرانی مشکل آتا چٹفنگ کن دا وڑ انا گام گیج وخت انا اہم گرج ءِ۔ سینیٹر سردار محمد عمر گورگیج پارے کہ سیمی واپار ءِ مونی دننگ، ہندی پوریاگرآتے آسراتی فراوان کننگ و ورناتیکن روزگار نا وارخواہی ودی کننگ آن بلوچستان اٹی زرگزرانی سرجزآتے پوسکن ءُ سوگوی اس رسینگ کیک۔ اواومیت درشان کرے کہ دا گام گیج آتیان انشاء اللہ بلوچستان اٹی گچین بدلی بریک، الس نا زرگزرانی حالیت آک گچین مریرہ و صوبہ ٹی شونداری و شونہالی نا پوسکن ءُ کسر ملنگک۔