پاکستان و روس انا نیام اٹ ڈیجیٹل زرگزران نا بھلو گمان ساڑی ارے،احسن اقبال

اسلام آباد، پاکستان و روس پوسکن آ ٹیکنالوجی نا بشخ آتیٹی ہڑتوم آ کنڈآتا کمکاری ءِ پوسکن آ بڑزی تیا دننگ، اے آئی‘ کلاؤڈ ٹیکنالوجی و سائبر سیکورٹی ٹی اسیجائی ڈٹ آتا بناءِ کننگ و پرائیویٹ بشخ انا نیام اٹ کاروباری رابطہ غاتے سوگو کننگ آ امنا کرینو۔ پنچ شنبے نادے آ بنجائی وزیر ڈٹ بندی، شونداری و خصوصی گام گیج پروفیسر احسن اقبال پاکستان و روس انا نیام اٹ آئی ٹی کمکاری نا بابت اڈ ہلوک ویبینار آن تران کرساپارے کہ ہڑتوم آ ملک آتا نیام اٹ ٹیکنالوجی نا بشخ اٹی کمکاری ءِ عملی شریداری، زرکاری و اسیجائی کاروباری ڈٹ آتیٹی بدل کننگ خوانہ تانکہ ہڑتوم آ ملک آک پوسکن آ جہانی منڈی اسکان رسینگ دوئی کننگ کیر۔ اوپارے کہ پاکستان و روس انا نیام اٹ ڈیجیٹل زرگزران و پوسکن آ ٹیکنالوجی ٹی کمکاری نا گیشتر گمان ساڑی ءِ۔ ہڑتوم آملک آتا کمپنی تے اسہ ایلو نا چاہنداری‘ آزموندہ، تکنیکی لائخی تیان فائدہ ہرفنگ نا وارخواہی فراوان کننگک۔ دا رد اٹ روس انا پنچ کمپنی تا پاکستانی ادارہ غاتتون 16 کاروباری اوڑدہی مسنے۔ احسن اقبال پارے کہ پاکستان 2035 ء اسکان اسہ ٹریلین ڈالر نا زرگزران مننگ نا ہدف تخک و داقومی شونداری وژن اٹی ڈیجیٹل زرگزران ءِ اہم اہمیت دوئی ءِ۔ اڑان پاکستان نا پنچ بنداوی تمبہ غاتیٹی ای پاکستان ہم اوار ءِ ہرانا کمک اٹ ملک ءِ پوسکن آ ٹیکنالوجی، ڈیجیٹل پوسکنوڑی و علم آ تالان زرگزران نا کنڈآن دننگ ءِ۔ بنجائی وزیرپارے کہ پاکستان ہرسال 75 ہزار آن زیات گریجویٹس تیار کننگ ءِ ہرا اے آئی و ایلو پوسکن آ ٹیکنالوجی نا بشخ آتیٹی ملک انا نہادی میرات ءُ۔