وزیراعلیٰ میر سرفراز بگٹی تون چنک سن شطرنج ماسٹر عبدالرحمان نا اوڑدہی

کوئٹہ، وزیراعلیٰ بلوچستان میر سرفراز بگٹی تون کم سن شطرنج ماسٹر عبدالرحمان اوڑدہی کرے، داوخت آ وزیراعلیٰ بلوچستان و کم سن شطرنج ماسٹر نا نیام اٹ شطرنج نا دوستانہ مقابلہ اس مس۔ وزیراعلیٰ میر سرفراز بگٹی عبدالرحمان نا ذہینی، لائخی و شطرنج نا گوازی ٹی کسبکاری نا ستاءِ کرسا اودے سفتی سرٹیفکیٹ و نغد انعام تس۔ اوڑدہی ٹی معلوم مس کہ کم سن شطرنج ماسٹر عبدالرحمان نا تعلقداری کوئٹہ نا اسہ نیزگار اُراسے آن ءِ و اونا باوہ بے روزگار ءِ۔ وزیراعلیٰ بلوچستان چنانا لائخی تا است بڈی تون اوار اونا خاہوت نا زرگزرانی مشکل آتا احساس ءِ کرسا اونا باوہ ءِ ملازمت تننگ نا پڑو ہم کرے۔ داوخت آ وزیراعلیٰ بلوچستان میر سرفراز بگٹی پارے کہ شطرنج کون آ ذہنی گوازی چناو ورناتیٹی غوروفکر، حکمت عملی، صبر و تحمل و وخت آ فیصلہ کننگ نا لائخی تے مونی دیک۔ بلوچستان نا چناتیٹی بے کچ لائخی ارے ہرافتے جوان وارخواہی وکاٹم خواجہی فراوان کرسا قومی و جہانی کہول آ درستی راستی کرفنگ مریک۔ وزیراعلیٰ پارے کہ صوبائی حکومت بلوچستان نا لائخ آ چناتا است بڈی و اوفتا لائخی تے مونی دننگ کن وس انا کچ آ کمک فراوان کیک۔ او دا ارادگی نا درشانی ءِ کرے کہ وسیلہ غاتا کمتی ءِ لائخ ءُ چناسے نا شونداری و سرسہبی نا کسر اٹ اڑاند مننگ کن النگ پننگک۔