ورنا تے روزگار فراوانی نا کاریم صوبہ نا کل آن بھلا چیلنج ءِ،گورنر بلوچستان

کوئٹہ، گورنر بلوچستان جعفرخان مندوخیل پارینے کہ ورنا تے روزگار فراوانی نا کاریم صوبہ نا کل آن بھلا چیلنج ءِ، ہراڑتون مون تننگ کن کشاری و ایلو زرگزرانی بشخ آتے پوسکنوڑ دور اتون اہم گرنچ کننگ المی ءِ، ورنا تے سرکاری ملازمت تا پٹ و پول اٹی مننگ نا جاگہ غا ایلوفتیکن روزگار نا وارخواہی ودی کننگ نا بود کار جوڑ کننگ وخت نا اہم ءُ گرج اسے، دود انا وخت آ وزیراعظم یوتھ لیپ ٹاپ پروگرام نا رد اٹ مسڑ طالب علم آتے لیپ ٹاپ تننگا، وخت اس کہ گورنر بلوچستان یونیورسٹی ٹی پوسکنوڑ ڈیجیٹل ای لائبریری نا بناءِ ہم کرے، او ای لائبریری ءِ اسہ اہم ءُ سرسہبی اس گوندسا پارے کہ ڈیجیٹل وسیلہ غاتسکان رسینگ گیگ ورنا تیٹی فکری تالانی، پٹ و پول و علم نا شون اٹی کمکار مریک، گورنر بلوچستان دا خیال آتا درشانی ءِ بولان یونیورسٹی آف میڈیکل اینڈ ہیلتھ سائنسز (BUMHS) کوئٹہ نا کنڈ آن پوسکن بروک آ مار و مسڑ طالب علم آتا شرف مندی اٹی اڈ ہلوک آ اورینٹیشن و وائٹ کوٹ دود آن تران کرسا کرے، دود اٹی صوبائی وزیر تعلیم راحیلہ حمید خان درانی، وائس چانسلر ڈاکٹر شبیر لہڑی، فیکلٹی ممبر، طالب علم و ایلو شرفدار آ شخصیت آک بشخ ہلکر، گورنر مندوخیل پارے کہ ہر دور انا تینا خواست آک مریرہ، مستین اکیڈمک ڈگری تا اہمیت زیات ئس داسہ ساڑی دور اٹی عملی چاہنداری تا و اسکل ڈیولپمنٹ نا اہمیت ترندی اٹ ودنگ اٹی ءِ، پروفیشنل و ٹیکنیکل کورس پورو کروک آ ورناک ملک و پیشن ملک گچین روزگار دوئی کننگ کیرہ، او پارے کہ ننا پبی کوشست ءِ کہ ورنا تیکن جاپان، چین و ایلو ملک آتیٹی اسکالرشپ نا وارخواہی ودی کننگ کین۔ او پبلک سیکٹر یونیورسٹی تا مالی کمک اٹی ساڑی حکومت و صوبائی وزیر تعلیم راحیلہ حمید خان درانی نا کڑد نا ستا ءِ کرسا پارے کہ سرکاری یونیورسٹی تے مون تروک آ ویل آتا ایسری و تعلیمی آب انا گچینی کن پدریسہ کوشست آک برجا ءُ، سینیٹ و سنڈیکیٹ آنبار انگا ادارہ غاک یونیورسٹی تا شونداری ٹی اہم کڑد ادا کیرہ۔ انتئے کہ اوفتیٹی بے کچ خوانندہ، آزموندہ کار و ماہر و سینئر شخصیت آک تینا بڑزکو کہولی پامداری و جم دانشمندی اٹ تعلیمی ادارہ غاتے سرسہبی نا کسر آ راہی روان کیرہ۔