اپنا گھر پروگرام نا رداٹ 104 ارب روپئی نا وام جاری کننگانے،سلاہکار بنجائی وزیر خزانہ

اسلام آباد، بنجائی وزیر خزانہ نا سلاہکار خرم شہزاد پارینے کہ وزیراعظم تینا اُرا پروگرام نا رداٹ ہنکینی وام تا فراوانی 104 ارب روپئی آن گدرینگانے وخت اس کہ جون 2026آن داتم اسکان وام تا بشخنگ اٹی 404 درسد ودکی ریکارڈ کننگا ہراڑان ہزار آ خاہوت آتا تینا اُرانا تغ حقیقت اٹ بدل کننگ نا کسر آوار مسنے۔ سوشل میڈیا پلیٹ فارم ایکس آ بیان اٹی اوپارے کہ وزیراعظم تینا اُرا پروگرام نا باضابطہ بنانا بیرہ شش تُو اٹی کم خڑچ ہنکینی فنانسنگ نا بشخ اٹی نمان پیشرفت مس و حکومتی قول عملی بھرم تے ٹی بدل مننگ ءِ۔ خرم شہزاد پارے کہ اکتوبر 2026 اسکان پروگرام نا رداٹ 104 ارب روپئی نا ہنکینی وام جاری کننگانے ہرافتیان 17 ہزار 697 خاہوت فائدہ ہرفیر، داکان بیدس 90 ہزار 405 درخواست آتا مون اٹ 533 ارب روپئی مالیت نا وام تا منظوری تننگانے۔ اوپارے کہ پروگرام نا رداٹ داتم اسکان جم وڑاٹ 2 لکھ 20 ہزار 715 درخواست دوئی مس ہرافتیان 41 درسد درخواست آتا منظوری ءِ تننگانے۔ او پارے کہ جون 2026 اٹی وام تا بشخنگ نا کچ 21 ارب روپئی ئس ہرا اکتوبر نا ایسراسکان ودسا 104 ارب روپئی مس ہنداوڑ داٹی 404 درسد ودکی ریکارڈ کننگا۔ داوخت اٹی منظور مروک وام تا جم مالیت ہم 144 ارب روپئی آن ودسا 533 ارب روپئی مس ہرا 269 درسد ودکی درشان کیک۔ خرم شہزاد پارے کہ ہنکینی وام تا فراوانی ٹی دا پیشرفت نئے بیرہ لس پاکستانی خاہوت آتیکن تینا اُرانا دوئی کننگ ءِ آسان جوڑ کننگ ءِ بلکن مالیاتی آسراتی اسکان رسینگ اٹی ودکی، ہاؤسنگ و تفوئی بشخ انا مونی دننگ و زرگزرانی سرجزآتے ترند کننگ اٹی ہم اہم کڑد ادا کننگ اٹی ءِ۔ او دا رد اٹ اسٹیٹ بینک پاکستان، پاکستان بینکس ایسوسی ایشن، شریدار بینک و وزارت ہاؤسنگ اینڈ ورکس نا کمکاری نا ستاءِ کرسا پارینے کہ وزیراعظم نا مالیاتی آسراتی اسکان رسینگ نا وژن ءِ وزیرخزانہ نا کماشی ٹی عملی دروشم اس تننگ کن تعلقدار ادارہ غاتا کوشست ستاکڑزک۔