پرائیویٹ زرکاری نا مونی دننگ کن کانودی اصلاحات المی ءِ،سینیٹر اعظم نذیر تارڑ

اسلام آباد، بنجائی وزیر کانود و انصاف سینیٹر اعظم نذیر تارڑ پارینے کہ پرائیویٹ زرکاری نا مونی دننگ زرکارآتا پت اتون گنڈوک ءِ، باندات آتیا ترند، انصاف اٹ و پیش گوئی نا قابل عملدرآمد زرکارآتا پت ءِ ودفنگ اٹ اہم کڑد ادا کیک۔ انصاف نا نظام اٹ اصلاحات بیرہ کانودی اف بلکن زرگزرانی اصلاحات نا اہم جزو ءِ۔ ترجمان نا رداٹ بنجائی وزیر داخیال آتا درشانی ءِ واشنگٹن اٹی ورلڈ بینک گروپ نا ہیڈ کوارٹر اٹی اڈ ہلوک جہانی کانود، انصاف و شونداری فورم 2026 نا وخت آ پرائیویٹ زرکاری نا مونی دننگ کن درکار کانودی اصلاحات نا بابت وزارتی گول میز دیوان آن تران کرساکرے۔ او فورم اٹی پاکستان نا نمائندگی ءِ کرے ہراٹی مچ آ دنیا غان 40 آن زیات وزیرو بڑزکو کانودی سرکڑدہ غاک بشخ ہلکر۔ سینیٹر اعظم نذیر تارڑ پاکستان اٹ کاروبار ءِ آسان جوڑ کننگ کن کروک آ کانودی و انتظامی گام گیج آتے مونی تخسا آسان کاروبار کانود، ون ونڈو بزنس پورٹل و زرکارآتے کن ون اسٹاپ شاپ نا جوڑ کننگ نا ذکر ءِ کرے۔ اوپارے کہ فارن انویسٹمنٹ پروموشن اینڈ پروٹیکشن ایکٹ 2022 بھلا درملکی زرکاری نا رکھ اکن اہم کانودی فریم ورک فراوان کیک۔ کمپنیز ایکٹ اٹی سلاہ ئی ترمیم آتا رداٹ چندی فوجداری سزاتا جاگہ غا مالی ڈنڈ درستی راستی کرفنگ و آن لائن فائلنگ نا نظام اس جوڑ کننگ نا سلاہ غا ہم سجفنگ انگ ءِ۔ بنجائی وزیر پارے کہ واپاری جھیڑہ غاتا دمدستی ایسری کن خصوصی واپاری عدالت آتا جوڑ کننگ، خیرخواہی نا نظام نا مونی دننگ و پوسکن آ خیرخواہی ایکٹ آ کاریم برجاءِ، پاکستان سنگاپور کنونشن آن میڈی ایشن آ دستخط کرینے وخت اس کہ اونا پک کننگ کن تعلقدار کانود سازی نا تیاری برجاءِ۔ اوپارے کہ پاکستان زرکاری کن ملوک ءِ و جہانی شریدار آتتون کانودی اصلاحات نا آزموندہ و گام گیج شیئر کننگ کن تیار ءِ۔