اسلام آباد ءِ پوسکن ءُ ماڈل شار اس جوڑ کننگ آ ترندی اٹ کاریم برجاءِ،بنجائی وزیر داخلہ

اسلام آباد، بنجائی وزیر داخلہ محسن نقوی پارینے کہ دارالحکومت نا پرائیویٹ ڈغارتیا مہالو آن جوڑ سوسائٹی تیکن ہندن ءُ ایسر اس کشوئی ءِ کہ مخلوق نا اُراک ہم بچر و اوفتے ریگولرائز ہم کننگے۔ اسلام آباد ءِ پوسکن ءُ ماڈل شار اس جوڑ کننگ نا جامع حکمت عملی نا رداٹ اسہ وخت اٹ 30 آن زیات شونداری ڈٹ آتیا ترندی اٹ کاریم برجاءِ۔ وزیراعظم ہاؤس نا پد اٹ پدی ہلوک اسہ ہزار کنال ڈغارتیا پوسکن سیل و سواتی ہند آتا جوڑ کننگ نا تیاری گڈیکو ریسہ غاتیٹی ءِ۔ راولپنڈی و اسلام آباد نا نیام اٹ ٹریفک نا کچ ءِ کم کننگ کن اہم الیونتھ ایونیو ڈٹ آہم زوت کاریم نا بناءِ کننگ انگ ءِ۔ او دا ہیت آتے کشمیر چوک انا دورہ ءِ کننگ نا وخت آ صحافی تتون ہیت وگپ کرسا کرے۔۔ اسہ سوج اسے نا ورندی ٹی وزیرداخلہ محسن نقوی پارے کہ اصل ویل دادے کہ سوسائٹیک مہالوآن جوڑ ءُ ہراڑے شاری تا اُراک جوڑ مسنو، ڈغارک پرائیویٹ ئسر ہرانا منظوری کن باندات آتے بائی پاس کننگا۔ او پیدوار کرے کہ داسہ ہندن ءُ بریبر و جامع ایسر اس تیار کننگ انگ ءِ ہراڑان لس شاری تا اُراک ہم بچر و دا سوسائٹی تے کانودی دنگ اٹ اتسا ریگولرائز ہم کننگے، ولے او سختی اٹ پارے کہ آخبت کن بیدس منظوری و بیدس ڈغار نا بیرہ فائل آتا ہل وتس نا چکر داسہ ہچ ءُ دروشم اسے ٹی ہلنگ پننگک۔ بنجائی دارالحکومت نا جم شونداری وژن آ ہیت کرسا اوپارے کہ اسلام آباد اٹی داوخت آ 30 آن زیات شونداری ڈٹ آتیا اسہ وخت آ کاریم چلینگ انگ ءِ وخت اس کہ پوسکن آ ڈٹ آتا اسہ بھلو لڑ اس ہم پیپ لائن اٹی ءِ۔ اوپارے کہ ننا مسخت بنجائی دارالحکومت ءِ ہندن ءُ است چکوک ءُ شاراس جوڑ کننگ ناءِ ہراڑے مخلوق بیرہ دفتری کاریم اسے ٹی بف، بلکن سیل وسوات کن اِرٹ آن چاردے اڈکے۔ اوپارے کہ شار اٹی پوسکن کرکٹ اسٹیڈیم نا بنداو ءِ ہم زوت تخنگک۔ وزیراعظم ہاؤس نا پد اٹ پدی ہلوک نہادی ڈغار تا بابت اوپارے کہ اسہ ہزار کنال ڈغارتیا پوسکن سیل و سواتی ہند، فائیو اسٹار ہوٹل و آب اٹو ریسٹورنٹ جوڑ کننگ نا ڈٹ آتا اِرٹ آن مسہ بریفنگ و پریزنٹیشنز پورو مسنے و بروک آ اسہ تُو اٹی دا بابت عملی پیشرفت مون آ بریک۔ جاڑ انگا شار تا نیام اٹ رابطہ و سفری آسراتی نا بابت اوپارے کہ الیونتھ ایونیو ڈٹ آ زوت باقاعدہ کاریم نا بناءِ کننگ انگ ءِ ہراداوخت آ گڈیکو ریسہ ٹی ءِ‘ ہرانا پوروی آن راولپنڈی و اسلام آباد نا نیام اٹ ہڑدے ہن و بر کروک آ شاری تے گچین و بدل گیگ سفری آسراتی دُوبریک۔