بلوچستان نا گرین بیلٹ اٹی شونداری حکومت نا وژن نا اہم ءُ بشخ اسے،سلیم خان کھوسہ

صحبت پور، صوبائی وزیر مواصلات و تعمیرات میر سلیم خان کھوسہ پارینے کہ بلوچستان نا گرین بیلٹ اٹی تعمیر و شونداری حکومت نا وژن نا اہم ءُ بشخ اسے، ساڑی حکومت گرین بیلٹ خاص وڑ اٹ نصیرآباد ڈویژن اٹی کسر تا تفنگ و جوڑجاڑ خصوصی چکار کننگ اٹی ءِ تاکہ کشارگر آتے تینا کشاری جنس آتے وخت آ و آسانی اٹ منڈی تسکان رسیفنگ اٹی آسراتی دوئی مرے و کشاری بشخ ءِ پین شون تننگ مرے‘ داڑتون اوار تعلیم، جانجوڑی و ایلو بنداوی بشخ آتیٹی سرکاری ماڑی تا تفنگ و جوڑجاڑ نا ڈٹ آتے ہم اولیتی بنداو آ پورو کرفنگ انگ ءِ تاکہ الس دا ڈٹ آتا بھرم تیان فائدہ ہرفنگ کے۔ دا خیال آتا درشانی ءِ او نصیرآباد ڈویژن نا دورہ نا وخت آ ضلع صحبت پور اٹی برجا شونداری ڈٹ آتا جاچ ءِ ہلنگ و تعلقدار افسر آتتون ہیت و گپ کرسا کرے۔ داکان مست صوبائی وزیر مواصلات و تعمیرات میر سلیم خان کھوسہ نا کماشی ٹی شونداری باندات تون تعلقدار جاچ دیوان اڈ ہلک، ہراٹی چیف انجینئر مواصلات و تعمیرات نصیرآباد زون بشیر ناصر اودے روڈ و بلڈنگ نا بشخ آتیٹی برجا شونداری ڈٹ، اوفتیا مروک پیشرفت و تفوئی کاریم تے پک کروک آب انا رد اٹ پورو کرفنگ نا بابت جم بریفنگ تس، وخت اس کہ ڈٹ آتا وخت آ پوروی ٹی مون تروک ویل آتیاں ہم معلومدار کرے۔ دیوان اٹی سپرنٹنڈنگ انجینئر فدا حسین کھوسہ و ارسلا رند، ایگزیکٹو انجینئر عبدالستار بنگلزئی، ارشاد علی سیلاچی، بوستان خان چانڈیو، خلیل احمد عمرانی، عتیق الرحمن، غلام دستگیر زہری، مجیب الرحمن ہاشمی، حاجی ریاض احمد کھوسہ و عطاء اللہ کھوسہ تون اوار ایلو تعلقدار افسر آک ساڑی ئسر۔ اوکان پد صوبائی وزیر مواصلات و تعمیرات میر سلیم خان کھوسہ ڈپٹی کمشنر صحبت پور فریدہ ترین تون اوار ضلع صحبت پور اٹی جتاجتا شونداری ڈٹ آتا دورہ ءِ کرے و تفوئی کاریم تا پیشرفت، آب و ایلو باندات آتا جاچ ءِ ہلک۔ دا وخت آ او چیف انجینئر مواصلات و تعمیرات بشیر ناصر ءِ پارت کرے کہ کل ایگزیکٹو انجینئر آتے سختی اٹ پابند کننگے کہ او تینا تینا علاقہ غاتیٹی برجا شونداری ڈٹ آتا تینٹ چاروکی ءِ کیر و تفوئی کاریم تا وخت آ جاگہ غا ساڑی مرسا دا ہیت ءِ پک کیر کہ ڈٹ آتیٹی آب اٹو مٹیریل کاریم اٹ اتنگے و تفوئی باندات آتے پک آب و پک کروک قاعدہ و ضابطہ نا رِد اٹ سر تننگے۔ او پارے کہ انجینئر آتا زمواری ءِ کہ او بیرہ دفتری کارروائی تسکان مننگ نا جاگہ غا عملی وڑ اٹ تفوئی ہند آتیا ساڑی مریر، کاریم نا پدریسہ چاروکی ءِ کیر و ہر وڑ انا ڈیوالئی یا ہیبدار تفوئی کاریم کن الیپس۔