لورالائی ٹی السی آسراتی تے پک کننگک،ولی محمد بڑیچ

لورالائی، کمشنر لورالائی ڈویژن ولی محمد بڑیچ لورالائی ٹیچنگ ہسپتال نا دورہ ءِ کرے، ہراڑے او ہسپتال اٹی ناجوڑ آتے فراوان کروک طبی آسراتی، ڈاکٹر و طبی کارندہ غاتا حاضری، سفائی دارو تا ساڑی گری و ایلو انتظامی باندات آتاجم جاچ ءِ ہلک۔ دورہ ناوخت آ میڈیکل سپرنٹنڈنٹ ڈاکٹر نقیب اللہ نیازی، ڈسٹرکٹ ہیلتھ آفیسر ڈاکٹر فہیم خان و ڈپٹی ایم ایس ڈاکٹر زین اللہ کاکڑ ہم اوڑتون اوار ئس۔ کمشنر ولی محمد بڑیچ ہسپتال نا وارڈ، ڈاکٹر آتا او پی ڈی رومز، لیبارٹری، آپریشن تھیٹر، ایم آر آئی، سی ٹی اسکین سینٹر، ادویات سینٹر، ہسپتال اٹی جوڑ کنٹرول روم و دیر انا بور و جتا جتابشخ آتا دورہ ءِ کرے؛ او تعلقدار کمامدار آتیان ہر بشخ انا کارکڑد، دوئی آسراتی، ناجوڑ آتے مون تروک مشکل و اوفتا ایسری کن کروک گام گیج آتا بابت جم بریفنگ دوئی کرے۔ کمشنر ہسپتال اٹی درمان مروک آ ناجوڑ و اوفتا خاہوت آتتون ہم اوڑدہی کرے و اوفتے فراوان کروک طبی آسراتی، داروتا ساڑی مننگ‘ ڈاکٹر آتا حاضری‘ تشخیص و درمان نا آب انا بابت دراست معلومداری دوئی کرے۔