کشت و کشار و مالداری بلوچستان نا اہم انگا زرگزران ءِ، گورنر

کوئٹہ، گورنر بلوچستان جعفرخان مندوخیل پارینے کہ بلوچستان جغرافیائی وڑ اٹ کشت وکشار‘ لائیو اسٹاک و ماہی گیری کن جوان ءُ علاقہ اسے۔ کشت وکشار و مالداری دا جاگہ نا الس نا اہم زرگزرانی وسیلہ غاک ءُ۔ بلوچستان مچ آ پاکستان نا غذائی گرج آتے پورو کننگ نا بود تخک۔ گرج دا ہیت انا ءِ کہ کشت وکشار‘ لائیو اسٹاک و ماہی گیری نا بشخ آتے پوسکنوڑ سائنسی وڑتتون ہگمرنچ کننگے و ہندی کشارگر، مالدار و ماہی گیر آتے پوسکنوڑ ٹیکنالوجی، وسیلہ و بنداوی آسراتی تیا رسینگ گیگ فراوان کننگے۔ پاکستان خاص وڑ اٹ بلوچستان نا میوہ و غذائی گڑاک آب اٹو‘ ذائقہ و قدرتی خصوصیات نا سوب آن جہانی کہول آ بھاز دوست کننگرہ۔ ہندا سوب آن المی ءِ کہ اوفتے جہانی منڈی تیٹی درستی راستی کرفنگے تاکہ ہندی زرگزران سوگو مرے و روزگار نا پوسکن آ وارخواہیک ودی مریر۔ دا ہیت ءِ او جہانی یومِ کنشت نا رد اٹ اقوامِ متحدہ نا ذیلی ادارہ فوڈ اینڈ ایگریکلچر آرگنائزیشن (FAO) نا کنڈآن اڈ ہلوک اولیکو بلوچستان فوڈ نمائش نا بناءِ کرسا کرے۔ دا وخت آ اقوامِ متحدہ نا ذیلی ادارہ ایف اے او نا سب آفس نا ہیڈ ولید مہدی، بیوٹمز یونیورسٹی نا وائس چانسلر ڈاکٹر خالد حفیظ، زرعی کالج نا پرنسپل ڈاکٹر شہنشاہ خان تون اوار کشت وکشار نا چاہندار و ورنا تا بھلو کچ اس ساڑی ئس۔