طالب علم آتا تینا تعلیمی سرجزآتے بے اڑاند برجاتخنگ المی ءِ،ڈاکٹر عبدالمالک بلوچ

کوئٹہ، نیشنل پارٹی نا بنجائی صدر مسکوہی وزیراعلیٰ بلوچستان ڈاکٹر عبدالمالک بلوچ تون اونا ہنکین اٹ بلوچ اسٹوڈنٹس آرگنائزیشن (بی ایس او) پجار نا بنجائی چیئرمین بوہیر صالح بلوچ و صوبائی جنرل سیکرٹری شے مرید رشید بلوچ اسک اہم اوڑدہی اس کریر۔ نیشنل پارٹی نا ترجمان نا بیان نا رداٹ اوڑدہی ٹی بی ایس او پجار نا ڈل کوئٹہ ٹی رہینگوک طالب علم آتے مون تروک چندی ویل آتیان مسکوہی وزیراعلیٰ بلوچستان ءِ سرجمی وڑ اٹ معلومدار کرے‘۔ ڈل خاص وڑ اٹ بروری روڈ تون اوار کوئٹہ نا چندی علاقہ غاتیٹی طالب علم آتے مون تروک ٹرانسپورٹ نا ویل، تعلیمی ادارہ غاتیٹی طالب علم آتے مون تروک مشکل و ایلو اہم تعلیمی و انتظامی باندات آ گپ وتران کریر۔ ڈل داہیت آ زور شاغا کہ طالب علم آتے تعلیمی ادارہ غاتسکان رسینگ کن مون تروک مشکل آتا ایسری و ٹرانسپورٹ نا آسراتی تا بحالی کن دمدستی گام گیج المی ءِ، تانکہ طالب علم آک تینا تعلیمی سرجزآتے بے اڑاند آن برجاتخنگ کیر۔ دا وخت آ ڈاکٹر عبدالمالک بلوچ بی ایس او پجار نا ڈل ءِ باوری کرفے کہ طالب علم آتا ویل و مشکل اوفتے کن اہم انگا باندات آتیٹی اوار ءُ۔ او پارے کہ طالب علم آتے مون تروک ویل آتا ایسری کن او بڑزکو کمامدار و تعلقدار ادارہ غاتتون دمدستی وڑاٹ رابطہ کرسا داویل آتا ایسری کن تینا کڑد ءِ ادا کیک۔