ساران تنگی نا ہند آ سیکورٹی فورس آتا انٹیلی جنس بیسڈ کارروائی، 6 دہشت گرد خلنگار

کوئٹہ، بلوچستان نا علاقہ شعبان و ساران تنگی نا ہند آ سیکورٹی فورس آک آپریشن شعبان 2 نا رد اٹ دہشت گرد آتا برخلاف انٹیلی جنس بیسڈ کارروائی تا وخت آ 6 دہشت گرد ءِ خلسا 9 شکبر بندغ دزگیر کریر و اوفتیان بھلو کچ اسے ٹی سلہہ ایمونیشن، منچر دوئی کریر۔۔ سیکورٹی حوالی نا رد اٹ تدوک آ دے سیکورٹی فورس آک آپریشن شعبان 2 انا رد اٹ دہشت گرد آتا برخلاف ساران تنگی ٹی کارروائی نا وخت آ فتنہ الہندوستان نا 6 دہشت گرد ءِ خلسا 9 شکبر بندغ ءِ دزگیر ہم کریر۔ دا کارروائی اودیم حوال آ کننگا و خلنگوک فتنہ الہندوستان نا دہشت گرد آتیان بھلو کچ اسے ٹی سلہہ، ایمونیشن، منچر دوئی کنگا‘ سیکورٹی فورس آتا کنڈ آن دہشت گرد آتا برخلاف کارروائی تا ریسہ برجاءِ۔ صدر مملکت آصف علی زرداری بلوچستان نا علاقہ ساران تنگی ٹی فتنہ الہندوستان نا 6 دہشت گرد ءِ خلنگ آ سیکورٹی فورس آتے خراجِ تحسین پیش کرینے، صدر مملکت دہشت گرد آتا ارادہ غاتے بے سہب کننگ آ سیکورٹی فورس آتا بہادری، کسبی چاہنداری و بھرمی کارروائی نا ستاءِ کرسا پارے کہ قوم تینا بہادر آ ورنا تا قربانی و خذمت آتے شرف ایتک۔ وزیراعظم محمد شہباز شریف بلوچستان نا علاقہ ساران تنگی اٹی سیکورٹی فورس آتا سرسہب کارروائی ٹی فتنہ الہندوستان آن تعلقدار 6 دہشت گرد ءِ خلنگ سیکورٹی فورس آتے خراجِ تحسین پیش کرینے، وزیراعظم پارے کہ سیکورٹی فورس آک بہادری، کسبی چاہنداری و بھرمی حکمت عملی نا کمک اٹ دہشت گرد آتا پراگندہ ارادہ غاتے بے سہب کریر۔ او پارے کہ ملک آن دہشت گردی نا پورو چٹفنگ اسکان آپریشن شعبان 2 ءِ برجا تخنگک۔ محمد شہباز شریف پارینے کہ پاکستان نا امن، سلامتی و شون ءِ نسخان رسینفنگ نا ہر کوشست ءِ پورو واک اٹ بے سہب کننگک وخت اس کہ دہشت گردی نا برخلاف سیکورٹی فورس و کانود نافذ کروک ادارہ غاتا کارروائیک برجا سلرہ۔ بنجائی وزیر داخلہ محسن نقوی بلوچستان اٹی آپریشن شعبان 2 نا رد اٹ فتنہ الہندوستان آن تعلقدار دہشت گرد آتا برخلاف سرسہب کارروائی تیا سیکورٹی فورس آتے خراجِ تحسین پیش کرے۔ وزیر داخلہ کارروائی ٹی 6 دہشت گرد ءِ خلنگ آ سیکورٹی فورس آتا کسبی واکداری، بہادری و بھرمی کارروائی ناستاءِ کرے۔ او پارے کہ سیکورٹی فورس آک سرسہب آپریشن نا کمک اٹ دہشت گرد آتا پراگندہ ارادہ غاتے بے سہب کریر، محسن نقوی پارے کہ سیکورٹی فورس آتا بہادر آ ورناک مچ آ قوم انا گمر ءُ و ملک نا امن و ایمنی نا رکھ اکن اوفتا خذمت آک ستا کڑزرہ۔ بنجائی وزیر داخلہ پارے کہ دہشت گردی نا چٹفنگ کن مچ آ قوم سیکورٹی فورس آتتون اوار سلوک ءِ و ملک انا امن و سوگوی نا برخلاف سرج آتا مون ءِ توننگک‘ داکان بیدس وزیراعلیٰ بلوچستان میر سرفراز بگٹی ساران تنگی ٹی سیکورٹی فورس آتا کنڈآن دہشت گرد آتا برخلاف سرسہب کارروائی ناستاءِ کرسا پارینے کہ دہشت گردی نا چٹفنگ و صوبہ ٹی امن کن سیکورٹی فورس آتا کارروائیک برجا سلرہ، وزیراعلیٰ بلوچستان پارے کہ آپریشن شعبان 2 انا رد اٹ ساران تنگی ٹی اودیم حوال نا بنداو آ کروک کارروائی ٹی فتنہ الہندوستان نا 6 دہشت گرد خلنگار وخت اس کہ 9 شکبر بندغ دزگیر کننگانو۔ میر سرفراز بگٹی پارے کہ سیکورٹی فورس آک وخت آ و بھرمی کارروائی نا کمک اٹ دہشت گرد آتا برخلاف اہم ءُ سرسہبی دوئی کرینو، دہشت گردی نا برخلاف جنگ اٹی سیکورٹی فورس آتا قربانیک ستا کڑزرہ۔