فوج قوم انا کمک اٹ دہشت گردی نا پورو چٹفنگ و امن کن سنبرینگوک ءِ،فیلڈ مارشل سید عاصم منیر

راولپنڈی، آرمی چیف و چیف آف ڈیفنس فورسز فیلڈ مارشل سید عاصم منیر پارینے کہ سلہہ بند فوج مچ آ قوم انا بدل مفروک مخ تفی اٹ دہشت گردی نا پورو چٹفنگ و ملک اٹ مدامگی امن کن سنبرینگوک ءِ۔ آئی ایس پی آر نا رداٹ آرمی چیف و چیف آف ڈیفنس فورسز فیلڈ مارشل سید عاصم منیر کور ہیڈ کوارٹر پشاور نا دورہ ءِ کرے۔ اودے خیبر پختونخوا ٹی سیکورٹی نا حالیت، برجا دہشت گردی تور آپریشن، بارڈر مینجمنٹ نا گام گیج و صوبہ ٹی تعینات فارمیشنز نا آپریشنل تیاری تا بابت حوال تننگا۔ فیلڈ مارشل سید عاصم منیر آفیسر و ورناتا بھلا حوصلہ، تیاری و کسبی چاہنداری نا ستاءِ کرسا ملک و اونا الس نا رکھ اکن اوفتا نزور مفروک ارادگی نا امنائی ءِ کرے۔ او فارمیشن آتے ہر وخت سنبرینگوک مننگ و آپریشنل تیاری نا بڑزکو آب آتے برجا تخنگ نا پارت کرے۔ او داہیت آ زور شاغا کہ سلہہ بند فوج قوم انا بدل مفروک مخ تفی اٹ دہشت گردی ءِ شکست تننگ و مچ آ ملک اٹ مدامگی امن و سوگوی ءِ پک کننگ نا تینا ارادگی آ سوگو سلوک ء۔ او شہید آتا یاتگار آپھُل آتا چادر اس تخا، دعاپاتیاکرے و لمہ وطن نا دفاع و دہشت گردی نا برخلاف جنگ اٹ تینا جان تے ندر کروک آتے گچین لوز آتے ٹی خراجِ عقیدت پیش کرے۔ او دا ارادگی نا درشانی ءِ کرے کہ شہید آتا دا عظیم قربانی تے اسُل گیرام کننگ مفک۔ پشاور آ بننگ آ کور کمانڈر پشاور چیف آف آرمی اسٹاف و چیف آف ڈیفنس فورسز ءِ بخیر کرے۔